নলবাৰীঃ শ্ৰী শ্ৰী শিৱৰাত্ৰি পূজা উপলক্ষে নলবাৰী জিলাৰ দক্ষিন দিশৰ নবীন তামুলী কৃষি ফাৰ্মত অৱস্থিত তিলানা শিৱ মন্দিৰত অগনন ভক্তৰ সমাগমেৰে এক উখল মাখল পৰিৱেশৰ সৃষ্টি হয়। 

উল্লেখ্য যে মহাদেৱ শিৱক পূজা অৰ্চণাৰে নিজৰ লগতে সমিজখনৰ মংগল কামনাৰ্থে সোমবাৰৰেপৰা তিলানা মন্দিৰত ভিৰ কৰে অঞ্চলটোৰ ভক্তসকলে। এই উপলক্ষে কালি পুৱাৰ ভাগত বৃক্ষৰোপন, আয়তীৰ নামৰ পাছত এখনি সম্বৰ্ধনা সভা অনুষ্ঠিত হয়।

শিল্পী সুনীল দাসে আঁত ধৰা অনুষ্ঠাটোত অসমীয়া চলচ্চিত্ৰ জগতৰ দুই পুৰোধা শিল্পী নিপন গোস্বামী আৰু চেতনা দাসক শিৱমন্দিৰ পৰিচালনা সমিতিৰ তৰফৰপৰা ফুলাম গামোচা, ফুলাম জাপিৰে সম্বৰ্ধনা জনোৱা হয়। 

এই অনুষ্ঠানটোতে অভিনেতা নিপন গোস্বামীয়ে মহিলাৰ নাগাৰা নাম উদ্ধোধন কৰি ভাষণত কয় যে আজিৰ সময় জটিল সময়। সম্প্ৰতি ভাৰতত বহুতো বাধা বিঘিনি হৈছে, বহুতো ভয়ানক সংঘাট হৈছে। সংঘাটপূৰ্ণ পৰিস্থিতিৰ অৱসানৰ বাবে শিৱৰ ওচৰত সেৱা জনাবলৈ সকলো ভক্ত ৰাইজলৈ তেওঁ আহ্বান জনায়।

ইফালে শিৱ পূজা উপলক্ষে নাগাৰা নাম, বন্তি প্ৰজ্বলন,আতচবাজী প্ৰদৰ্শন, নিশা সাংস্কৃতিক সন্ধিয়াত জনপ্ৰিয় কন্ঠশিল্পী যুৱচামৰ হিয়াৰ মনি বাবুৰ গীতেৰে উপস্থিত সকলক মুগ্ধ কৰে আৰু আজিও বহু দূৰ দূৰনিৰপৰা অহা ভক্তৰ লানি নিচিঙা ভিৰ দেখিবলৈ পোৱা গৈছে৷