নিউয়ৰ্কঃ ৰাষ্ট্ৰপতি নিৰ্বাচনত ডোনাল্ড ট্ৰাম্পৰ মূল শ্লোগান আছিল মেক আমেৰিকা গ্ৰেট এগেইন৷ নিৰ্বাচনী প্ৰচাৰত বাৰে বাৰে এই শ্লোগান আওৰাইছিল ডোনাল্ড ট্ৰাম্পে৷ আমেৰিকাৰ নিবাসীসকলৰ জীৱন উন্নত কৰাৰ সপোন দেখুৱাই ডোনাল্ড ট্ৰাম্প ৰাষ্ট্ৰপতি হ’ল৷ তেওঁ দ্বিতীয়বাৰৰ বাবে ৰাষ্ট্ৰপতিৰ নিৰ্বাচনৰ মুখামুখি হৈ বিপুলসংখ্যক ভোটেৰে সংখ্যাগৰিষ্ঠতা লাভ কৰিছিল।
কিন্তু বাস্তৱত আমেৰিকা গ্ৰেট হৈছেনে? কাৰ্যভাৰ গ্ৰহণ কৰাৰ চাৰি মাহৰ ভিতৰতে সমগ্ৰ আমেৰিকাত ট্ৰাম্পৰ বিৰুদ্ধে ব্যাপক প্ৰতিবাদ আৰম্ভ হৈছে৷ তেওঁক পুনৰ ক্ষমতালৈ ভোট দি আগুৱাই নিয়া আমেৰিকানসকলেই এতিয়া ৰাজপথলৈ ওলাই আহি সাব্যস্ত কৰিছে প্ৰতিবাদ। আমেৰিকাৰ সময় অনুসৰি শনিবাৰে পুৱাৰে পৰা নিউয়ৰ্ক, ক’লৰাডো, হিউষ্টন, লছ এঞ্জেলছ, ৱাশ্বিংটনৰ ৰাজপথত ট্ৰাম্প বিৰোধী প্ৰতিবাদ দেখিবলৈ পোৱা গৈছে৷ এই ঘটনাই স্বাভাৱিকতে ট্ৰাম্প প্ৰশাসনক অস্বস্তিত পেলাইছে৷ প্ৰতিবাদকাৰী লাখ লাখ আমেৰিকানে কৈছে, ‘আমেৰিকাৰ কোনো ৰজা নাই। আমেৰিকাত ফেচিবাদ নচলিব৷’
মন কৰিবলগীয়া যে দ্বিতীয়বাৰ শাসনলৈ অহাৰ পাছত ডোনাল্ড ট্ৰাম্প প্ৰশাসনে গ্ৰহণ কৰা কিছু সিদ্ধান্তই অশান্তিৰ পৰিৱেশ সৃষ্টি কৰিছে আমেৰিকাত৷ কেৱল আমেৰিকাই নহয়, বিশ্ব সমাজতো পৰিছে ট্ৰাম্পৰ সিদ্ধান্তৰ প্ৰভাৱ৷ শেহতীয়াকৈ ট্ৰাম্পে ঘোষণা কৰা পাৰস্পৰিক শুল্ক নীতিয়ে আমেৰিকাৰ শ্বেয়াৰ মাৰ্কেটতো ব্যাপক স্খলন আনি দিছে৷ ভাৰতকে ধৰি আন আন দেশৰ অৰ্থনীতিৰ ওপৰতো পৰিছে এই নীতিৰ ব্যাপক ঋণাত্মক প্ৰভাৱ৷ আনফালে শাসনলৈ প্ৰত্যাৱৰ্তন কৰিয়েই ট্ৰাম্পে লিংগ সন্দৰ্ভত কৈছিল যে আমেৰিকাত কেৱল পুলিংগ আৰু স্ত্ৰী লিংগৰ নাগৰিকহে থাকিব৷ অন্য লিংগক স্বীকৃতি দিয়াত অনিচ্ছা প্ৰকাশ কৰিছিল ট্ৰাম্পে৷
কেৱল এয়াই নহয়, ক্ষমতালৈ আহি ট্ৰাম্পে অনুপ্ৰৱেশকাৰীক হাতে-ভৰিয়ে শিকলি বান্ধি আমেৰিকাৰ পৰা বিতাড়ন কৰা ঘটনাই বিশ্বৰ সন্মুখত লজ্জানত কৰিছিল আমেৰিকাক৷ এনে ঘটনাসমূহৰ সমান্তৰালকৈ আমেৰিকাৰ প্ৰচলিত সংৰক্ষণ ব্যৱস্থাৰ সালসলনি কৰি বৃহৎসংখ্যক আমেৰিকান লোকক চাকৰিৰ পৰা বৰ্খাস্ত কৰা ঘটনাত উমি উমি জ্বলি আছিল বিদ্ৰোহৰ অগনি৷
এই সকলোবোৰৰ ভিতৰত বিশেষকৈ ট্ৰাম্পৰ নতুন শুল্ক নীতিক লৈ দেশৰ বাহিৰত ব্যাপক অসন্তুষ্টিৰ সৃষ্টি হৈছে। ইউৰোপৰ কেইবাখনো দেশ, ব্ৰিটেইন, এছিয়াৰ কিছুমান দেশ ট্ৰাম্পৰ এই সিদ্ধান্তত ক্ষুব্ধ হৈ পৰিছে। চীনে পোনপটীয়াকৈ শুল্ক যুদ্ধত প্ৰৱেশ কৰিছে। ফলত কেৱল সমগ্ৰ বিশ্বতে নহয়, আমেৰিকাতো মন্দাৱস্থাৰ ভাবুকি আহি পৰিছে। সেইবাবেই ঘৰতে অৰ্থাৎ আমেৰিকাত ট্ৰাম্পৰ বিৰুদ্ধে সাধাৰণ মানুহ ৰাজপথলৈ ওলাই আহিছে।
কেৱল ডোনাল্ড ট্ৰাম্পেই নহয়, ট্ৰাম্পৰ ক্ষমতাত বলীয়ান হৈ ওভতগোৰে নাচিবলৈ আৰম্ভ কৰা ইলন মাস্কৰ বিৰুদ্ধেও সাব্যস্ত হৈছে প্ৰতিবাদ৷ বিভিন্ন সংবাদ প্ৰতিষ্ঠানৰ প্ৰতিবেদন অনুসৰি কেৱল ৱাশ্বিংটনতে প্ৰায় ২০ হাজাৰ আমেৰিকান লোকে ৰাজপথলৈ ওলাই আহি ট্ৰাম্পৰ বিৰুদ্ধে প্ৰতিবাদ সাব্যস্ত কৰিছে। ট্ৰাম্পৰ বিৰুদ্ধে সৃষ্টি হোৱা এনে জাগৰণে আগন্তুক সময়ত কি ৰূপ লয়, তাৰ প্ৰতি দৃষ্টি ৰাখিছে বিশ্ব নাগৰিকে৷