নাজিৰাঃ শিৱসাগৰ আৰু চৰাইদেউ জিলাৰ প্ৰায় সাতশ ৰন্ধন কৰ্মীয়ে শনিবাৰে দুঘন্টাৰ বাবে শিৱসাগৰ জিলা উপায়ুক্ত কাৰ্যালয়ৰ সন্মুখত প্ৰতিবাদ সাব্যস্ত কৰে।
শিৱসাগৰ আৰু চৰাইদেউ জিলাৰ ৰন্ধন কৰ্মীসকলে বছৰ বছৰ ধৰি বহু কষ্ট ত্যাগ কৰি মাহে কেৱল ১০০০ টকা মাননিতে কাম কৰি আহিছে। এই সামান্য মাননিও মাহৰ পাছত মাহ পাৰ হৈ গ’লেও হাতত নপৰেহি।
ইয়াৰ উপৰিও উক্ত তেওঁলোকৰ কৰ্মসংস্থাপনৰ মুদা মাৰি চৰকাৰে এই কাম এতিয়া ৰাজ্যৰ বাহিৰৰ ব্যক্তিগত প্ৰতিষ্ঠানক গতাই দিবলৈ লৈছে।
ৰন্ধন কৰ্মীসকল সমস্যাৰাজি চৰকাৰক বাৰে বাৰে অৱগত কৰাৰ পাছতো চৰকাৰে কোনো ধৰণৰ ব্যৱস্থা গ্ৰহণ নকৰাত দুয়োখন জিলাৰ ৰন্ধন কৰ্মী আৰু কৃষক মুক্তি সংগ্ৰাম সমিতিৰ যৌথ উদ্যোগত শিৱসগৰ জিলা উপায়ুক্ত কাৰ্যালয়ৰ সন্মুখত হাতে হাতে প্লে কাৰ্ড লৈ প্ৰতিবাদ সাব্যস্ত কৰে।
ৰন্ধন কৰ্মীৰ বেতন প্ৰতিমাহে দিয়াৰ ব্যৱস্তা কৰক, NGOক কাম দিয়া বন্ধ কৰক, ৰন্ধন কৰ্মীৰ দৰমহা ৫ হাজাৰলৈ বৃদ্ধি কৰক, নৰেন্দ্ৰ মোডী হুচিয়াৰ, অসম চৰকাৰ হায় হায়, মন্ত্ৰী সিদ্ধাৰ্থ হুচিয়াৰ আদি শ্ল’গান দি উক্ত দাবীৰে স্মাৰক-পত্ৰ শিৱসাগৰ জিলা উপায়ুক্তক দিয়ে আৰু ১০ দিনৰ ভিতৰত ৰন্ধন কৰ্মীৰ দাবীসমূহ পূৰণ কৰিবলৈ দাবী জনায়। ইয়াৰ অন্যথা আগন্তক লোকসভা নিৰ্বাচনত বিজেপিক ভালকৈ 'বিহু দেখুৱাব’ বুলি কয়।