ডিজিটেল ৰিপ'ৰ্টঃ ৰাজ্যত আজি পুনৰাই ভূমিষ্ঠ হ'ল আন এক ছাত্ৰ সংগঠনৰ। ৰাজ্যত কে'বাটাও ছাত্ৰ সংগঠন বৰ্তি থকাৰ সময়তে আজি গুৱাহাটীত জন্ম হয় এই নতুন ছাত্ৰ সংগঠনটোৰ।
নতুনকৈ জন্ম লাভ কৰা এই ছাত্ৰ সংগঠনটো হৈছে নাথ-যোগী ছাত্ৰ সন্থা।নাথ যোগী জনজাতি আৰু স্বায়ত্বশাসিত দাবী পৰিষদৰ বিশেষ প্ৰচেষ্টাত জন্ম লাভ কৰে এই সংগঠনটোৱে।
এই অনুযায়ী আজি পল্টনবজাৰস্থিত ৰাষ্ট্ৰীয় মজদুৰ কংগ্ৰেছ ভৱনত পৰিষদৰ এখন সভা অনুষ্ঠিত হয়। উক্ত সভাতে সদৌ অসম ভিত্তিত নাথ যোগী ছাত্ৰ সন্থাৰ কেন্দ্ৰীয় তদৰ্থ কমিটিখন গঠন কৰা হয়।
নাথ যোগী জনজাতি আৰু স্বায়ত্বশাসিত দাবী পৰিষদৰ সভাপতি ডম্বৰুধৰ নাথৰ সভাপতিত্বত অনুষ্ঠিত হোৱা উক্ত সাধাৰণ সভাতেই সৰ্বসন্মতি ক্ৰমে দৰং জিলাৰ ধনমণি শইকীয়াক সভাপতি আৰু কোকৰাঝাৰৰ অৰবিন্দ নাথক সাধাৰণ সম্পাদক হিচাপে লৈ নাথ যোগী ছাত্ৰ সন্থাৰ এক শক্তিশালী কমিটি গঠন কৰা হয়।
ছাত্ৰ সংগঠনটোৰ নৱ-নিৰ্বাচিত সভাপতি ধনমণি শইকীয়া আৰু সাধাৰণ সম্পাদক অৰবিন্দ নাথে স্বগোষ্ঠীয় আৰু সামাজিক সমস্যা সমাধানৰ লগতে ছাত্ৰ ছাত্ৰীৰ শৈক্ষিক দিশত ছাত্ৰ সংগঠনটোৱে কাম কৰি যাব বুলি প্ৰকাশ কৰিছে।