ডিজিটেল ডেস্কঃ ধাৰাসাৰ বৰষুণে উত্ত-পূৰ্বাঞ্চলৰ কেউখন ৰাজ্যলৈ বানপানী, গৰাখহনীয়া আৰু ভূমিস্খলনৰে ভয়াৱহ প্ৰাকৃতিক দুৰ্যোগ কঢ়িয়াই আনিছে। বিশেষকৈ অসম, মণিপুৰ, মেঘালয় আৰু অৰুণাচল প্ৰদেশত লাখ লাখ লোক গৃহহীন হৈ পৰিছে।
অৰুণাচল প্ৰদেশত ভূমিস্খলনৰ ফলত বাট-পথ বন্ধ হৈ পৰাৰ ফলত জনজীৱন স্তব্ধ হৈ পৰিছে। অৰুণাচল প্ৰদেশৰ সীমাতে লাগি থকা অসমৰ জিলাকেইখনতো বানপানীৰ লগতে ভুতৰ ওপৰত দানৱ পৰাদি পৰিছে ভূমিস্খলন।
যাতায়ত একপ্ৰকাৰ স্তব্ধ হৈ পৰিছে। নামনি সোৱণশিৰি জিলাত ভয়াৱহ ভূমিস্খলনত লিকাবালি ৰোডত পোত গৈছে একাধিক বাহন।একেদৰে মেঘালয়তো পোৱা গৈছে ভূমিস্খলনৰ ফলত বিস্তৰ ক্ষতিৰ বাতৰি। বতৰ বিজ্ঞান বিভাগৰ আগজাননী মতে অধিক বৰষুণ হ’ব এইকেইদিনত। ফলত সমস্যা দুগুণ বাঢ়িব।
অসমত বানপানীত ঘৰ-দুৱাৰ ডুবাৰ লগতে খেতিপথাৰো জলমগ্ন হৈ পৰাত শংকিত হৈ পৰিছে সকলো। ৰাজ্যখনৰ ৮ খনৰো অধিক জিলা কম-বেছি পৰিমাণে বানপানীৰ কবলত পৰিছে।
ধেমাজী, লখিমপুৰ, যোৰহাট, বৰপেটা, কৰিমগঞ্জ, কাছাৰ, কাৰ্বি আংলং আৰু বিশ্বনাথ- এইকেইখন জিলাৰ অধিংকাংশ অঞ্চল পানীত ডুব গৈছে। আলাই-আথানি হৈছে মানুহ আৰু পশুধনৰ। প্ৰায় ৩ লাখৰো কাষ পাইছে বানাক্ৰান্তৰ সংখ্যা। একেই পৰিস্থিতি দেখা গৈছে মণিপুৰ আৰু অৰুণাচলত। ভূমিস্খলনত স্তব্ধ হৈ পৰিছে ইটানগৰ।