♦ ওদালগুৰি আঞ্চলিক এবছুৰ সোণালী জয়ন্তী উৎসৱৰ সামৰণি অনুষ্ঠানত প্ৰমোদ বড়ো
ওদালগুৰিঃ 'হাগ্ৰামাই পৃথক বড়োলেণ্ড ৰাজ্যক লৈ বড়ো আৰু অবড়ো লোকৰ মাজত বিভাজন ঘটাই ৰাজনীতিৰ সৃষ্টি কৰিছে। কেৱল মাত্ৰ অনাবড়ো ভোটাৰৰ ভোট লাভৰ স্বাৰ্থত বৰ্তমান নিৰ্বাচনী সভা-সমিতিত বড়োলেণ্ড গঠন হোৱাটো অসম্ভৱ বুলি কৈ ফুৰিছে। এসময়ত পৃথক বড়ো ৰাজ্যৰ দাবীৰে সশস্ত্ৰ সংগ্ৰাম কৰি বৰ্তমান বিটিচি প্ৰধান হোৱা হাগ্ৰামাই এতিয়া পৃথক বড়োৰাজ্য গঠন হোৱাটো অসম্ভৱ বুলি কোৱা ভাষ্য কোনেও গ্ৰহণ নকৰে। তেওঁ বিটিচি অঞ্চলৰ বড়ো আৰু অনাবড়োসকলক পৃথক পৃথক কৰি বিভাজনৰ ৰাজনীতি আৰম্ভ কৰিছে।’ এই মন্তব্য নিখিল বড়ো ছাত্ৰ সন্থা চমুকৈ এবছুৰ কেন্দ্ৰীয় সভাপতি প্ৰমোদ বড়োৰ।
ছাত্ৰ সংগঠনটোৰ ওদালগুৰি আঞ্চলিক সমিতিৰ সোণালী জয়ন্তী উদযাপন তথা ৪৮ সংখ্যক বাৰ্ষিক অনুষ্ঠানৰ মুকলি সভাত মুখ্য অতিথিৰূপে উপস্থিত থাকি সাংবাদিকৰ আগত এই ভাষ্য প্ৰদান কৰে এবছুৰ সভাপতিগৰাকীয়ে। লগতে তেওঁ সংগঠনটোৰ আঞ্চলিক সমিতিখনৰ বৰ্তমানৰ আৰু প্ৰাক্তন বিষয়-ববীয়াসকলক সোণালী জয়ন্তী বৰ্ষত উপনীত হোৱা বাবে শুভেচ্ছা জ্ঞাপন কৰে। এবছু বৰ্তমান কেৱল এটা ছাত্ৰ সংগঠনতে সীমাবদ্ধ নহৈ ই এক দৰ্শনলৈ ৰূপান্তৰ হোৱা বুলি উল্লেখ কৰি বড়োৱে কয় যে এবছুৱে এতিয়া বড়ো জনগোষ্ঠীতোৰ সৰ্বাংগীন বিকাশৰ ক্ষত্ৰতো গুৰি ধৰিছে।
বড়ো জাতিৰ কৃষ্টি-সংস্কৃতি, অস্তিত্ব ৰক্ষাৰ বাবে এবছুৰ লগতে আন বড়ো সংগঠনসমূহে কাম কৰি আছে আৰু ইয়াৰ কোনো বিকল্প পথ নাই। ইফালে বিটিচি প্ৰধান হাগ্ৰামা মহিলাৰীক 'বছ’ বুলি সম্বোধন কৰি বছে সংবিধান অধ্যয়ণ নকৰি পৃথক বড়ো ৰাজ্য সন্দৰ্ভত নেতিবাচক মন্তব্য কৰি আহিছে।
এয়া কেৱল নিজৰ মুনাফা আদায় তথা ৰাজনৈতিক লাভালাভৰ বাবে হাগ্ৰামাই কৈ অহা বুলিও তেওঁ মতামত ব্যক্ত কৰে। ইফালে একাংশ বিধায়ক তথা সাংসদৰ ভূমিকাক সমালোচনা কৰি সভাপতি বড়োৱে ৰাইজৰ সমস্যাৰ কথা সদনত উত্থাপন নকৰি নিজৰ লাভালাভৰ কথা চিন্তা কৰা এনে বিধায়ক-সাংসদৰ আমাৰ প্ৰয়োজন নাই বুলি উল্লেখ কৰি এইবেলি পাৰ্টীৰ সলনি প্ৰাৰ্থীক চাইহে ৰাইজক ভোটদানৰ পৰামৰ্শ প্ৰদান কৰে।
ইয়াৰোপৰি অগপ সন্দৰ্ভত এক সমালোচনাত্মক মন্তব্য কৰি অগপই এতিয়া আঞ্চলিকতাবাদৰ মৰ্যাদা হেৰুওৱা বুলিও প্ৰকাশ কৰে। আগন্তুক লোকসভা নিৰ্বাচনত আঞ্চলিকতাবাদ জীয়াই ৰখাৰ লক্ষ্য আগত ৰাখি ওলাই অহা ইউনাইটেট পিপলছ পাৰ্টী লিৱাৰেল চমুকৈ ইউপিপিএলক সমৰ্থন কৰাৰ কথাও বড়োৱে সাংবাদিকৰ আগত উল্লেখ কৰে।
শেষত হাগ্ৰামা মহিলাৰীৰ ৰাজনৈতিক জীৱন উন্নতিৰ লগতে সুস্বাস্থ্য কামনা কৰে এবছুৰ সভাপতিগৰাকীয়ে। মুকলি সভাৰ মাজতে "বাহিনীগামী খাম্ফা" নামৰ এখন স্মৃতিগ্ৰন্থও উন্মোচন কৰা হয়। আজিৰ সভাত উপস্থিত থাকে এনডিএফবি(প্ৰ)ৰ সভাপতি ধীৰেণ বড়ো, বড়ো উইমেন জাষ্টিছ ফ’ৰামৰ সভানেত্ৰী ড৹ অঞ্জলি দৈমাৰী, ইউপিপিএলৰ মংগলদৈ লোকসভা সমষ্টিৰ প্ৰাৰ্থী প্ৰদীপ কুমাৰ দৈমাৰী, বড়ো সাহিত্য সভাৰ সম্পাদক নীলকান্ত গৈয়াৰীৰ লগতে বহু বিশিষ্ট ব্যক্তি।