73
তিনিচুকীয়াঃ অইল ইণ্ডিয়া লিমিটেডৰ দায়িত্বজ্ঞানহীন কৰ্মকাণ্ড কোনো নতুন কথা নহয়। অইল কৰ্তৃপক্ষৰ দায়িত্বহীনতাৰ ফলত একাধিকবাৰ তেল পৰিবাহী পাইপলাইনত বিস্ফোৰণ, খাদত বিস্ফোৰণৰ ফলত বিস্তৰ অঞ্চলৰ কৃষক ৰাইজ, পশুধন, শস্য পথাৰৰ ক্ষয়-ক্ষতিৰ উদাহৰণৰ পিছত আজি পুনৰ অইলৰ চৰম অবিবেচকী কৰ্ম-কাণ্ডৰ ফলত তিনিচুকীয়া জিলাৰ বৃহৎ অঞ্চল এটালৈ আহি পৰিছে ভয়ংকৰ বিপদৰ আগজাননী।
আজি ডিব্ৰু-ছৈখোৱা ৰাষ্ট্ৰীয় উদ্যানৰ পৰা মাত্ৰ পাঁচশ মিটাৰ আঁতৰত থকা অইল ইণ্ডিয়া লিমিটেডৰ বাঘজান OCSৰ ৫ নম্বৰ খাদত বুধবাৰে পুৱাই অইলৰ চূড়ান্ত গাফিলতিৰ বাবে পাইপলাইনত বিস্ফোৰণ ঘটি অহৰহ গেছ নিৰ্গত হৈ আছে৷ দ্ৰুত গতিত নিৰ্গত হোৱা গেছ এই পৰ্যন্ত অইল কৰ্তৃপক্ষই নিয়ন্ত্ৰণ কৰিবলৈ সক্ষম হোৱা নাই ফলত সমগ্ৰ অঞ্চলটো পাইপ ফুটি নিৰ্গত হোৱা গেছে ছানি ধৰিছে৷