newsnextone.com | ডিজিটেল ডেস্কঃ আপুনি কি কি কাৰণত বিবাহ বিচ্ছেদ বিছৰাৰ বিষয়ে জানে? পাৰিবাৰিক অশান্তি, মতৰ অমিল, অহমিকা আদি গুৰুত্বপূৰ্ণ পাৰিবাৰিক সমস্যাৰ বাবেই নহয় জানো? আমিও এনেবোৰ কাৰণৰ বাবেই এহাল দম্পত্তিৰ মাজত বিবাহ বিচ্ছেদ হ’ব পাৰে বুলিয়েই জানো৷ 

কিন্তু গুজৰাটৰ আহমদাবাদত এজন লোকে তেওঁৰ পত্নীৰ পৰা বিবাহ বিচ্ছেদ বিছৰাৰ কাৰণ এয়া নহয়৷ লোকজনৰ মতে তেওঁৰ পত্নী বেছ মৰমীয়াল, তেওঁৰ খেয়াল ৰাখে৷ পৰিয়ালটোৰ প্ৰতিও তেওঁৰ পত্নী সমানেই দায়বদ্ধশীল৷ কিন্তু কথাটো হ’ল, তেওঁৰ পত্নীৰ মুখত দাঢ়ি আছে আৰু তেওঁৰ পত্নীৰ মাতটো পুৰুষৰ দৰে৷ যাৰ বাবে লোকজনে তেওঁৰ পত্নীৰ পৰা বিবাহ বিচ্ছেদ বিচাৰিছে৷

আহমদাবাদৰ এখন পাৰিবাৰিক আদালতত লোকজনে বিবাহ বিচ্ছেদৰ বাবে কৰা আবেদনত পত্নীৰ বিষয়ে উল্লেখ কৰি কয় যে, বিবাহৰ পূৰ্বে তেওঁৰ পত্নীৰ পৰিয়ালে তেওঁৰ সৈতে বিশ্বাস ঘাটকতা কৰিছে৷ বিবাহৰ পূৰ্বে পত্নীয়ে পৰম্পৰা অনুসৰি বোৰ্খা পৰিধান কৰি আছিল বাবে তেওঁৰ মুখমণ্ডল লোকজনে দেখিবলৈ সক্ষম হোৱা নাছিল৷ 

আনহাতে তেওঁ চাবলৈ যোৱা যুৱতীগৰাকীৰ মুখত দাঢ়ি থকা বুলি পৰিয়ালৰ লোকে নজনোৱা বুলিও অভিযোগ উত্থাপন কৰে লোকজনে৷ 

আনফালে বিবাহ বিচ্ছেদৰ বাবে আবেদন জনোৱা লোকজনৰ পত্নীয়ে তেওঁৰ অভিযোগ খাৰিজ কৰে৷ শৰীৰৰ হৰমনৰ বিসংগতিৰ বাবেই তেওঁৰ মুখত সামান্য পৰিমানে দাঢ়িৰ নিচিনা চুলি থকা বুলি উল্লেখ কৰি সেয়া উচিত চিকিৎসাৰে আঁতৰাব পাৰি বুলি দাবী কৰে পত্নীয়ে৷ আনহাতে পৰকীয়া প্ৰেমৰ বাবেই স্বামীয়ে তেওঁৰ পৰা বিবাহ বিচ্ছেদ বিচৰা বুলিও দাবী কৰে পত্নীয়ে৷

অৱশ্যে ন্যায়াধীশ এন এম কাৰৌৱাদিয়াৰ পাৰিবাৰিক আদালতে দাখিল কৰা বিবাহ বিচ্ছেদৰ আবেদনখন এক হাস্যকৰ বিষয় বুলি মন্তব্য কৰি খাৰিজ কৰে৷ পত্নীৰ মুখত দাঢ়ি থকা বাবেই কোনো দম্পত্তিৰ বিবাহ বিচ্ছেদ হ’ব নোৱাৰে বুলি স্পষ্ট কৰি দি আদলতে দম্পত্তিহালক পাৰিবাৰিক জীৱনত গুৰুত্ব প্ৰদান কৰিবলৈ পৰামৰ্শ দিয়ে৷