newsnextone.com | ওৰাংঃ এনআৰচিৰ চূড়ান্ত খচৰা প্ৰকাশ পাবলৈ মাজত মাথো কেইটামান ঘণ্টা বাকী। ৩০ জুলাইত এনআৰচি কৰ্তৃপক্ষই প্ৰকাশ কৰিব এনআৰচিৰ সম্পূৰ্ণ খচৰা। ইতিমধ্যে এই ক্ষণলৈ বাট চাই ৰৈছে। ইপিনে খচৰা প্ৰকাশৰ পিছত ৰাজ্য যাতে কোনো অসুস্থ পৰিবেশৰ সৃষ্টি নহয় তাৰ বাবে সজাগতা সৃষ্টিৰ লক্ষ্যৰে ৰাজ্যৰ দল-সংগঠনে কাম কৰি থকা পৰিলক্ষিত হৈছে৷ সমানে ৰাজ্যৰ প্ৰশাসনেও অব্যাহত ৰাখিছে এই চেষ্টা৷
৩০ জুলাইত নাগৰীক পঞ্জী উন্নীতকৰণৰ খচৰা প্ৰকাশ পাব৷ ৰাজ্যৰ বিভিন্ন প্ৰান্তৰ লগতে এনআৰচিৰ খচৰা প্ৰকাশৰ কাম দ্ৰুত গতিত আগবাঢ়িছে ওদালগুৰি জিলাতোঁ।
তাৰ মাজতে ওদালগুৰি জিলাৰ ওৰাঙত নাগৰিক সমিতিয়ে এখন সভা অনুষ্ঠিত কৰে। NRCৰ চূড়ান্ত খচৰা প্ৰকাশৰ প্ৰাকমুহূৰ্তত ওৰাং থানা চৌহদত অনুষ্ঠিত সভাত এছএছবিৰ উচ্চ পদস্থ বিষয়া, ওৰাং আৰক্ষী থানাৰ ভাৰপ্ৰাপ্ত বিষয়া গগন চন্দ্ৰ ডেকাই অঞ্চলটোৰ ৭১ খন গাঁৱৰ ৰাইজৰ সহায় কামনা কৰে।
কোনো ধৰণৰ উৰাবাতৰিৰ চক্ৰান্তত পৰি যাতে কোনো ঘটনা সংঘটিত হ'ব নোৱাৰে তাৰ বাবে গাওঁৰক্ষী বাহিনীৰ লোকসকলৰ লগতে সমাজৰ সচেতনমহলক পদক্ষেপ গ্ৰহণ কৰিবলৈ আহ্বান জনায়। যিকোনো ধৰণৰ অপ্ৰীতিকৰ খবৰ বাতৰি পোৱাৰ লগে লগে প্ৰশাসনক অৱগত কৰি NRCৰ প্ৰক্ৰিয়াৰ মাজত যেন কোনো অসুবিধাৰ সৃষ্টি নহয় তাৰ বাবে আহ্বান জনায়।