নামৰূপঃ শ্ৰীমন্ত শংকৰদেৱ সংঘৰ নতুন পদাধিকাৰ তথা বৈষ্ণৱ পণ্ডিত কমলাকান্ত গগৈক বৃহস্পতিবাৰে নামৰূপ মহাবিদ্যালয়ৰ তৰফৰপৰা সম্বৰ্ধনা জনোৱা হয়।
এই উপলক্ষে মহাবিদ্যালয় চৌহদত আয়োজিত সভাত পদাধিকাৰ গগৈয়ে ছাত্ৰ-ছাত্ৰীসকলক উদ্দেশ্যি নৈতিক শিক্ষা আৰু শিক্ষাৰ্থীৰ কৰণীয় সন্দৰ্ভত এক মূল্যৱান ভাষণ আগবঢ়ায়।
মহাবিদ্যালয়খনৰ ভাৰপ্ৰাপ্ত অধ্যক্ষ অতুল গগৈয়ে সভাপতিত্ব কৰা আৰু পদাৰ্থবিদ্যা বিভাগৰ সহযোগী অধ্যাপক ডঃ দুৰ্গাপ্ৰসাদ গগৈয়ে আঁত ধৰা সভাখনত শিক্ষক-শিক্ষয়িত্ৰীৰ লগতে ছাত্ৰ-ছাত্ৰীসকলে আংশগ্ৰহণ কৰে। এই উপলক্ষে পদাধিকাৰগৰাকীয়ে মহাবিদ্যালয় চৌহদত গছপুলিও ৰোপণ কৰে৷
পদাধিকাৰ কমলাকান্ত গগৈক উপাধ্যক্ষ বিমল গগৈ, মহাবিদ্যালয়খনৰ সৰ্বজ্যেষ্ঠ অধ্যাপিকা উৎপলা বৰুৱা আৰু সহযোগী অধ্যাপিকা ডঃ নিবেদিতা ফুকনে শৰাই, চেলেং চাদৰ আৰু গামোচাৰে সম্বৰ্ধনা জনায়।
RUSA-ৰ অৰ্থসাহায্যত মহাবিদ্যালয়খনত নিৰ্মিত ছাত্ৰ জিৰণি চ’ৰা আৰু মহিলাৰ অধ্যয়ণ আৰু উন্নয়ণ কোষৰ এটা কোঠা আজি পদাধিকাৰগৰাকীয়ে উদ্বোধন কৰে৷ এই দুই কোঠা মুকলিৰ পূৰ্বে পদাধিকাৰ গগৈক RUSA-ৰ সঞ্চালিকা ডঃ ৰঞ্জনা বৰা বৰদলৈয়ে ফুলাম গামোচাৰে আদৰণি জনায়৷
নগাঁওস্থিত মহাপুৰুষ শ্ৰীমন্ত শংকৰদেৱ বিশ্ববিদ্যালয়ৰ আচাৰ্য হিচাপে দুই-এদিনতে দায়িত্বভাৰ ল’বলগীয়া পদাধিকাৰ গগৈৰ দৰে ব্যক্তিত্বক সম্বৰ্ধনা জনাবলৈ পাই মহাবিদ্যালয়-পৰিয়াল ধন্য হৈছে বুলি জানিবলৈ দিছে সহয়োগী অধ্যাপক ডঃ দুৰ্গাপ্ৰসাদ গগৈয়ে৷