ডিজিটেল ডেস্কঃ বিশ্ব কঁপাই ফাদিল হ’ল কৰ ফাঁকি দি জমা কৰা বিশাল পৰিমানৰ ধনৰ তথ্য। সমগ্ৰ বিশ্বৰ সমুখলৈ আহিল চাঞ্চল্যসৃষ্টিকাৰী পেৰাডাইজ পেপাৰত থকা কৰ ফাঁকি দিয়া সকলৰ নাম। প্রধানমন্ত্রী নৰেন্দ্র মোডীৰ নোটবন্দিৰ বর্ষপূর্তিৰ পূৰ্বে ওলাই পৰিল সকলোকে কঁপাই তোলা এই খবৰ। বিশ্বজোৰা আর্থিক কেলেংকাৰিৰ প্ৰমাণ দিলে ইন্টাৰনেচনেল কনচৰটিয়াম অফ ইনভেষ্টিগেটিভ জার্নেলিষ্ট (আইচিআইজে )৷ বিশ্বৰ ১০০টা সংবাদ সংস্থাৰ যৌথ তদন্তত পোহৰলৈ আহে প্রায় ১ কোটি ৩৫ লাখ নথিপত্ৰৰ বিপুল ভাণ্ডাৰ৷
প্রাথমিক তথ্য অনুযায়ী বিদেশৰ কৰ ফাঁকিৰ স্বর্গৰাজ্যত বিনিয়োগ কৰিছে ব্রিটেইনৰ ৰাণী এলিজাবেথৰ পৰা আৰম্ভ কৰি মার্কিন ৰাষ্ট্ৰপতি ডোনাল্ড ট্রাম্পৰ বাণিজ্য সচিবলৈকে৷ ইয়াৰ পূৰ্বে ২০১৩ চনৰ পানামা পেপাৰ্চ কেলেংকাৰি নামৰে খলকনি লগাইছিল বিশ্বজুৰি। পৰৱর্তী পর্যায়ত নাম দিয়া হৈছে পেৰাডাইজ পেপাৰ্চ৷ এই তালিকাত নাম আছে বহু ভাৰতীয় শিল্পী আৰু ৰাজনীতিকৰো৷
৭১৪ জন ভাৰতীয়ৰ নাম সহ তালিকাত ভাৰত আছে ১৯ নম্বৰত। আহিবলগীয়া দিনত ৪০টা ৰিপোর্টৰ এই কলা টকাৰ তথ্য ফাদিল কৰিব ইণ্ডিয়ান এক্সপ্রেছো৷ প্রথম প্ৰতিবেদনত মোডী চৰকাৰৰ মন্ত্রী জয়ন্ত সিনহা, বিগ বি অমিতাভ বচ্চন, প্ৰাক্তন কেন্দ্ৰীয় মন্ত্ৰী শচীন পাইলট, পি চিদাম্বৰমৰ পুত্ৰ কাৰ্তি চিদম্বৰম লগতে কংগ্ৰেছ নেতা ভায়ালাৰ ৰবি, বীৰাপ্পা মৈলিৰ পুত্ৰৰ নাম থকা বুলি প্ৰচাৰ হৈছে। বিজেপি ৰাজ্যসভা সাংসদ তথা প্রাক্তন হিন্দুস্তান সমাচাৰ সাংবাদিক আৰু নিৰাপত্তা সংস্থা এচআইএচ চিকিউৰিটি গ্রুপৰ প্রতিষ্ঠাতা আৰ কে সিনহাৰ নাম৷ এই তালিকাত বিজয় মালিয়া আৰু কর্পোৰেট লবিষ্ট নীৰা ৰাডিয়াৰ নামো আছে৷
বাৰ্মুদাৰ আইনি সংস্থা আপলবি আৰু চিঙ্গাপুৰৰ এছিয়াচিটি ট্রাষ্ট আৰু কৰফাঁকিৰ স্বর্গৰাজ্য বুলি পৰিচিত ১৯টা গোপন সংস্থাাৰ এই বিপুল তথ্যভাণ্ডাৰ সংগ্রহ কৰিছে জার্মান সংবাদপত্র চুডডয়চে চাইটুঙে৷ সেই তথ্য দিছে আইচিআইজকো৷ আইচিআইজেৰ অন্যতম সহযোগী হিচাপে তালিকাত থকা ভাৰতীয়ৰ তথ্য অনুসন্ধান কৰিছে ইণ্ডিয়ান এক্সপ্রেছে৷ তাতেই দেখা গৈছে কৰ ফাঁকি দিয়া বিশ্বৰ বিভিন্ন দেশৰ ধনকুবেৰ সকলৰ নাম।
দেওবাৰে মাজনিশা ফাদিল হোৱা এই কেলেঙ্কাৰিত সকলোতকৈ ডাভৰ নামটোৱে হৈছে ব্রিটেইনৰ ৰাণী দ্বিতীয় এলিজাবেথেৰ৷ জনা গৈছে যে,ৰাণীৰ নিজস্ব সম্পত্তিৰ প্রায় ১৩ মিলিয়ন ডলাৰ বিদেশত জমা কৰা আছে। এইবাৰ পেৰাডাইজ পেপাৰত নাম জড়িত হ’ল পাকিস্তানৰ প্রাক্তন প্রধানমন্ত্রী চৌকৎ আজিজৰো নাম৷ ঘনিষ্ঠ সহযোগী আৰু নির্বাচনী তহবিলৰ দায়িত্বত থকা ষ্টিফেন ব্রনফেন এই তালিকাত থকাত বিপাঙত পৰিছে কানাডাৰ প্রধানমন্ত্রী জাষ্টিন ট্রুডোও৷ তীব্র চাপ পৰিছে ট্রাম্পৰ বিৰুদ্ধে। কিয়নো ঘনিষ্ঠা উইলবাৰৰ নামো চৰ্চালৈ আহিছে৷