ঢকুৱাখনাঃ বাপতিসাহোন পৰম্পৰাৰে ঐতিহ্যমণ্ডিত চাৰিকড়ীয়া নৈৰ পাৰত অহা ১২ মে’ পৰা উদযাপন হ'ব ফাটবিহু ২০১৭। ফাটবিহু সমিতি আৰু ফাটবিহু উদযাপন সমিতিৰ উদ্যোগত আৰু চহা ঢকুৱাখনাবাসীৰ আতিথ্যত ফাট বিহুৰ স্থায়ী বিহু বাকৰি ম’হঘূলি চাপৰিত তিনি দিনীয়া কাৰ্যসূচীৰে এই লোক বসন্ত উৎসৱ অনুষ্ঠিত হ’ব। উদযাপন সমিতিৰ সম্পাদক নিতুল বৰুৱা আৰু সভাপতি বিনোদ গগৈয়ে জনোৱা মতে ১২ মে’ৰ প্ৰথমদিনা পুৱা ৯:৩০ পতাকা উত্তোলন কৰিব ফাটবিহু সমিতিৰ সভাপতি প্ৰদীপ চমুৱাই, ১০ বজাত স্মৃতি তৰ্পণ কৰিব উদযাপন সমিতিৰ সভাপতি বিনোদ গগৈয়ে।
ইয়াৰ পিছতে মুকলি কৰা হ’ব মঞ্চ। মঞ্চ মুকলিৰ পিছতে টকাবিহু প্ৰতিযোগিতা আৰু চেমনীয়া হুঁচৰি প্ৰতিযোগিতা অনুষ্ঠিত হ’ব। ১৩ মে’ৰ দ্বিতীয়দিনা পুৱা ৯:৩০ বজাত কপৌফুল ৰোপণ আৰু বৃক্ষৰোপণ কৰিব প্ৰকৃতিবিদ দেৱজিৎ ফুকনে। ইয়াৰ পাছত ক্ৰমে গামোচা প্ৰতিযোগিতা, বিহুদল সমূহলৈ আদৰণি, প্ৰাক্তন সম্পাদক-সভাপতিসকলক সম্বৰ্ধনা আৰু পূৰ্ণবয়স্ক হুঁচৰি প্ৰতিযোগিতা অনুষ্ঠিত হ’ব। প্ৰতিযোগিতাৰ অন্তত উন্মোচন কৰা হ’ব ফাটবিহুৰ বছেৰেকীয়া প্ৰকাশ 'বিহুৱান’।
আনহাতে অন্তিম দিনা অৰ্থাৎ ১৪ মে’ৰ পুৱা ১০ বজাত ফাটবিহুৰ অতিকে আকৰ্ষণীয় বৰ্ণাঢ্য সাংস্কৃতিক শোভাযাত্ৰা উদ্বোধন কৰিব জনপ্ৰিয় অভিনেত্ৰী আশা বৰদলৈয়ে। দিনৰ ১২ বজাত অনুষ্ঠিত হ’ব ফাটবিহুৰ মুখ্য আকৰ্ষণ শাৰী শাৰী চিচুগছৰ তলত মুকলি বিহু প্ৰতিযোগিতা।
মুকলি অধিৱেশনত মুখ্য অতিথি হিচাবে মুখ্যমন্ত্ৰী সৰ্বানন্দ সোণোৱাল, সন্মানীয় অতিথি হিচাবে সাংস্কৃতিক মন্ত্ৰী নৱ কুমাৰ দলে, বিশিষ্ট অতিথি হিচাপে জ্যেষ্ঠ সাংবাদিক অজিত কুমাৰ ভূঞা, অসম সাংস্কৃতিক সঞ্চালকালয়ৰ সচিব-দেৱ প্ৰসাদ মিশ্ৰ আৰু অসম মাধ্যমিক শিক্ষা পৰিষদৰ সচিব কমলজ্যোতি গগৈ, নিৰ্দিষ্ট বক্তাৰূপে সাহিত্যিক মনজিৎ সিং আৰু আমন্ত্ৰিত অতিথিৰূপে সাংস্কৃতিক কৰ্মী দয়াল কৃষ্ণ নাথৰ লগতে কেবাগৰাকী বিশিষ্ট ব্যক্তিয়ে অংশগ্ৰহণ কৰিব।
ফাটবিহু সমিতিৰ সভাপতি প্ৰদীপ চমুৱাৰ সভাপতিত্বত অনুষ্ঠিত হ’বলগীয়া মুকলি অধিৱেশন উদ্বোধন কৰিব লখিমপুৰৰ উপায়ুক্ত বৰুণ ভূঞাই। উল্লেখ্য যে ফাটবিহু ঢকুৱাখনীয়া ৰাইজৰ হিয়াৰ আমঠু-বাপতি সাহোন লোক উৎসৱ। প্ৰবাদ আছে যে ই তাহানিৰ হাবুং ৰাজ্য বৰ্তমানৰ ঢকুৱাখনা চাৰিকড়ীয়া নৈৰ পানীৰ ‘ফাট’ত ষোল্ল শতিকাৰ পৰাই অনুষ্ঠিত হৈ আহিছে। আহোম ৰাজত্বকালত স্বৰ্গদেউসকলে নৈৰ পাৰৰ একোডোখৰ ঠাইত বেহা-বেপাৰ কৰিবলৈ সুবিধা কৰি দি ফাট বহুৱাইছিল। উত্তৰ অসম অন্যতম পুৰণি ঠাই ঢকুৱাখনাতো এনে ফাট বা হাট বহিছিল আৰু কৰ-কাটল লোৱা হৈছিল। বেহা-বেপাৰ আৰু কৰ-কাটল সংগ্ৰহৰ ঠাই হোৱা বাবে স্বাভাৱিকতে বিভিন্ন ঠাইৰ মানুহ আহি এই ফাটত সমবেত হৈছিল।
চাৰিকড়ীয়া নৈৰ পানীফাট বা ঘাটতেই পূৰ্বতে ব’হাগৰ সাতবিহু যোৱাৰ পিছত ঢকুৱাখনা(পূৰ্বতে হাবুঙ)ৰ কেইবাটাও জনগোষ্ঠীয় লোকে একেলগ হৈ বিহু মাৰিছিল। ফাটত অনুষ্ঠিত হোৱা বাবেই এই বিহুক ‘ফাটবিহু’ বোলা হয়। আহোম যুগৰে পৰা কুৰি শতিকাৰ দ্বিতীয় দশকমানলৈ ব’হাগ মাহৰ প্ৰথম সাতদিনত ঢকুৱাখনাত ফাট-বিহু অনুষ্ঠিত হৈছিল বুলি জনা যায়।
বৰ্তমান এই ফাটবিহু বহাগ মাহৰ শেষৰটো শুকুৰ, শনি আৰু দেওবাৰে তিনিদিনীয়া কাৰ্যসূচীৰে পালন কৰা হয়। টাই ভাষাৰ শব্দ ‘ফাট’ৰ অৰ্থ হ’ল নৈ বা গভীৰ পানী থকা ঠাইৰ দাঁতিত বেহা-বেপাৰ, কৰ-কাটল সংগ্ৰহ আদি কামৰ বাবে সমবেত হোৱা ঠাই৷ এই ফাটক বহুতে ঘাট বা হাট ৰূপেও ব্যৱহাৰ কৰিছিল৷ ঢকুৱাখনা মহকুমা বৰ্তমান লখিমপুৰ জিলাৰ অন্তৰ্গত যদিও ১৯৮৯ চনলৈকে অবিভক্ত লখিমপুৰ জিলাৰ ধেমাজি মহকুমাৰ অন্তৰ্গত এটা বিস্তৃত অঞ্চল আছিল।
সামগ্ৰিকভাৱে ঢকুৱাখনা বুলি ক’লে ২৭.২৬ উত্তৰ অক্ষাংশ আৰু ৯৪.২৪ পূৱ দ্ৰাঘিমাংশৰ পৰা ৯৮.৪২ পূৱ দ্ৰাঘিমাংশৰ অন্তৰ্গত ভৌগোলিক এলেকাৰ ভূখণ্ডকে নিৰ্দেশ কৰে। ফাটবিহু তলীৰ স্থায়ী মাটি ৩৭ বিঘা। ঢকুৱাখনা অঞ্চলটোক ব্ৰহ্মপুত্ৰ আৰু ইয়াৰ প্ৰধান উপনৈ সোৱণশিৰিয়ে আৱৰি আছে। ঢকুৱাখনা নগৰৰ দাঁতিয়েদি বৈ যোৱা চাৰিকড়ীয়া নৈৰ পাৰতে পৰম্পৰা আৰু ঐতিহ্যৰ মাজেৰে অনুষ্ঠিত হয় এই ঐতিহাসিক ফাটবিহু।
স্বনামধন্য ঔপন্যাসিক হোমেন বৰগোহাঞিয়ে নিজৰ সাহিত্যৰে ফাটবিহুতলিৰ নামটো ম’হঘূলি চাপৰি হিচাপে নামকৰণ কৰিছিল। তেওঁ চাৰিকড়ীয়া নৈৰ উত্তৰ দিশত থকা বৰ্তমান চাৰিকড়ীয়া নৈৰ পকা দলংখনৰ পশ্চিমৰ এটি অৰণ্যময় চাপৰিৰ নাম ম’হঘূলি চাপৰি বুলি উল্লেখ কৰিছিল। গুৰুত্বপূৰ্ণ যে ১৯৯৬ চনৰ পৰা চাৰিকড়ীয়া নৈৰ পাৰৰ ম’হঘূলি চাপৰিৰ চিচু গছৰ বালিচাপৰিৰ মাজত স্থায়ীভাৱে মঞ্চ সাজি ফাটবিহু উৎসৱটি অনুষ্ঠিত হৈ আহিছে। ই নৈপৰীয়া ঢকুৱাখনা জনজীৱনৰ অতিকে হেঁপাহৰ, মৰমৰ, পৰম্পৰাগত জাতি-জনগোষ্ঠীৰ সমন্বয়ৰ উৎসৱ। প্ৰাণস্পন্দন ফাটবিহু কৃষিজীৱী ঢকুৱাখনাৰ একক আৰু পৃথক লোক বসন্ত উৎসৱ হিচাপে পৰিচিত। এই উৎসৱক লৈ এতিয়া ব্যস্ত হৈ পৰিছে ঢকুৱাখনাবাসী।