কাকপথাৰত মানৱ-শৃংখল, ডিৰাকত অৰ্ধ উলংগ প্ৰতিবাদ

 | by NNO Correspondent  |  0
Printer-friendly version

কাকপথাৰঃ নাগৰিকত্ব সংশোধনী বিধেয়কে ক্ৰমাৎ বিষম কৰি তুলিছে শান্তিময় অসমৰ প্ৰতিটো ক্ষণ। আজি তেনে ক্ষণৰেই আঁত ধৰি হিন্দু নাগৰিকত্ব সংশোধনী বিধেয়ক ২০১৬ বাতিলৰ দাবীত কাকপথাৰবাসী ৰাইজৰ মানৱ-শৃংখল আৰু অসম অৰুণাচল সীমান্তৱৰ্তী ডিৰাক চাৰিআলিত ডিৰাকবাসী ৰাইজ, স্থানীয় দল-সংগঠন, অনুষ্ঠান-প্ৰতিষ্ঠানৰ যৌথ উদ্যোগত এক অৰ্ধ উলংগ প্ৰতিবাদী সমদলেৰে প্ৰতিবাদ সাব্যস্ত কৰে ৷ 

১ নং সৰুডিৰাক ৰাজহুৱা খেলপথাৰৰ পৰা আৰম্ভ হোৱা অৰ্ধ উলংগ প্ৰতিবাদী সমদলটোৱে ডিৰাক চাৰিআলি হৈ ৰংপুৰীযা গাওঁলৈকে পৰিভ্ৰমণ কৰি পৰিবেশ উত্তাল কৰি তোলে ৷ "হিন্দু নাগৰিকত্ব বিধেয়ক ২০১৬ বাতিল কৰক" "নৰেন্দ্ৰ মোদী হুছিয়াৰ", "সৰ্বানন্দ সোণোৱাল গ' বেক", "বিজেপি গ’ বেক", "বিজেপি নিপাত যাওঁক","অসম চৰকাৰ হায় হায়", "সৰ্বানন্দ সোণোৱাল জাতিদ্ৰোহী" ইত্যাদি বিভিন্ন শ্লগানেৰে  আকাশ-বতাহ কপাঁই তোলে ৷

আজিৰ কাৰ্যসূচীত মৰাণ ছাত্ৰ সন্থাৰ উপসভাপতি শান্তনু মৰাণ, সহঃসম্পাদক প্ৰতাপ মৰাণ, তিনিচুকীয়া জিলা কৃষক মুক্তি সংগ্ৰাম সমিতিৰ সভাপতি খেম বড়া, নাৰী মুক্তি সংগ্ৰাম সমিতিৰ তিনিচুকীয়া জিলাৰ সভানেত্ৰী দিম্পী দত্ত, সদৌ অসম মটক যুৱ-ছাত্ৰ সন্মিলনৰ সদস্য পূৰ্ণানন্দ বুঢ়াগোহাঁই, ছাত্ৰ মুক্তি সংগ্ৰাম সমিতিৰ জিলা সমিতিৰ সদস্য উদ্দীপ্ত বড়া, কাকপথাৰ আঞ্চলিক ছাত্ৰ সন্থাৰ বিষয়ববিয়া, সদৌ মৰাণ ছাত্ৰ সন্থা ডিৰাক আঞ্চলিক সমিতিৰ সভাপতি কুলজিত মৰাণ, সম্পাদক চৌবিক মৰাণৰ লগতে পাঁচ শতাধিক লোকে অংশ গ্ৰহণ কৰে।

সমদলৰ অন্তত অনুষ্ঠিত হোৱা প্ৰতিবাদী সভাত উপস্থিত থাকি সদৌ মৰাণ ছাত্ৰ সন্থা কেন্দ্ৰীয় সমিতিৰ সহঃ সম্পাদক প্ৰতাপ মৰাণে নাগৰিকত্ব সংশোধনী বিধেয়ক ২০১৬ যি কোনো মূল্যৰ বিনিময়ত বাতিল কৰিবৰ বাবে চৰকাৰক ৰাজি কৰাব লাগিব, প্ৰয়োজন হলে আত্মজাহ দিবলৈও ৰাজি বুলি উল্লেখ কৰাৰ লগতে সদৌ অসম ছাত্ৰ সন্থাক অসমৰ মূখ্যমন্ত্ৰী সৰ্বানন্দ সোণোৱালক দিয়া জাতীয় নায়কৰ উপাধি ঘূৰাই লবলৈ আহ্বান জনায়।

সভাত উপস্থিত থকা বিভিন্ন সংগঠনৰ বিষয়ববিয়াসকলে একেমুখে প্ৰধান মন্ত্ৰী নৰেন্দ্ৰ মোদী, কেন্দ্ৰীয় গৃহমন্ত্ৰী ৰাজনাথ সিং, অসমৰ মূখ্যমন্ত্ৰী সৰ্বানন্দ সোনোৱাল তথা বিজেপি চৰকাৰখনক মিছলীয়া, দেশদ্ৰোহী, জাতিদ্ৰোহী আদি বিভিন্নধৰণে সমালোচনা কৰাৰ লগতে নাগৰিকত্ব সংশোধনী বিধেয়ক ২০১৬ যদি বাতিল নকৰে তেন্তে অসমৰ পৰিস্থিত অতি ভয়ঙ্কৰ হব আৰু ইয়াৰ বাবে বৰ্তমানৰ বিজেপি চৰকাৰখনে সম্পূৰ্ণ জগৰীয়া হব বুলি উল্লেখ কৰে।