মঙলদৈঃ উচ্চতম ন্যায়ালয়ৰ ৰায়ৰ অপবাখ্যা আৰু অৱমাননাৰে অসমৰ গৰাখহনীয়া পীড়িত ভূমিহীন লোকক উচ্ছেদ কৰিছে চৰকাৰ আৰু প্ৰশাসনে। এই অভিযোগ কৰিছে উচ্ছেদ বিৰোধী গণ মঞ্চ, অসমে। দৰং জিলাৰ ছিপাঝাৰ মৌজাৰ অন্তৰ্গত ফুহুৰাতলী আৰু মঙলদৈ ৰাজহ চক্ৰৰ হিলৈখুন্দা গাঁৱৰ উচ্ছেদিত লোকসকলৰ সকলৰ ক্ষতিপূৰণ আৰু পুনৰসংস্থাপনৰ দাবীৰ লগতে ৰাষ্ট্ৰীয় নাগৰিকপঞ্জীৰ কাম সম্পূৰ্ণ নোহোৱালৈকে সকলো ধৰণৰ উচ্ছেদ বন্ধ কৰাৰ দাবীত আজি মঙলদৈ চহৰত উচ্ছেদ বিৰোধী গণ মঞ্চ, অসমে দৰং জিলা উপায়ুক্তৰ কাৰ্যালয়ত এক বিশাল গণ ধৰ্ণা কাৰ্যসূচী ৰূপায়ণ কৰি উত্তাল প্ৰতিবাদ সাব্যস্ত কৰে।
ইয়াৰ পূৰ্বে আজি ছিপাঝাৰ ৰাজহ চক্ৰৰ ফুহুৰাতলী চৰাঞ্চলৰ পৰা সহস্ৰাধিক প্ৰতিবাদকাৰীয়ে উচ্ছেদক অমানবীয় আখ্যা দি বিভিন্ন শ্লোগানেৰে আকাশ বতাহ কঁপাই দৰং জিলা উপায়ুক্তৰ কাৰ্যালয়ত উপদেষ্টা তৰুণ ডেকাৰ সঞ্চালনাত প্ৰতিবাদী কাৰ্যসূচীৰ ৰূপায়ণ কৰে।
প্ৰতিবাদী সভাত অংশগ্ৰহণ কৰি উচ্ছেদ বিৰোধী গণ মঞ্চৰ সভাপতি ভৱেন সন্দিকৈ আৰু সাধাৰণ সম্পাদক আশ্ৰাফুল হুছেইনে কয় যে- ন্যায়ালয়ৰ ৰায়ৰ অপবাখ্যা আৰু অবমাননাৰে গৰাখহনীয়াপীড়িত ভূমিহীন লোকক উচ্ছেদ কৰিছে অসম চৰকাৰে। ২০১৬ চনৰ ডিচেম্বৰ মাহৰ ২১ তাৰিখে দৰং জিলাৰ ছিপাঝাৰ মৌজাৰ অন্তৰ্গত ফুহুৰাতলী গাঁৱত মাত্ৰ ১০ ঘণ্টা পূৰ্বে বিসংগতিপূৰ্ণ জাননী জাৰি কৰি জিলা প্ৰশাসনে উচ্ছেদ চলাই ২৮০ টা পৰিয়াল আৰু শতাধিক দোকান ধ্বংসস্তুপত পৰিণত কৰা কাৰ্যক গৰিহণা দিয়ে মঞ্চই।
একেখন জিলাৰ মঙলদৈ ৰাজহ চক্ৰৰ অন্তৰ্গত মায়ং এলেকাৰ হিলৈখুন্দা গাঁৱত ৯ নৱেম্বৰ ২০১৬ তাৰিখে কোনো ধৰণৰ জাননী প্ৰদান নকৰাকৈয়ে বেআইনীভাবে উচ্ছেদ কাৰ্য চলাই প্ৰায় তিনি শতাধিক পৰিয়ালক গৃহহীন কৰা কাৰ্যকো কঠোৰ ভাষাৰে সমালোচনা কৰে মঞ্চই।
একেখন জিলাৰে হিলৈখুন্দা গাঁৱৰ ভূমিক কেন্দ্ৰ কৰি মাননীয় গুৱাহাটী উচ্চ ন্যায়ালয়ৰ মজিয়াত এখন গোচৰ চলি আছিল যদিও পৰৱৰ্তী শুনানিৰ এদিন পূৰ্বেই লোকসকলক প্ৰশাসনে বেআইনী ভাবে উচ্ছেদ কৰে। আদালতত ভুক্তভোগী সকলে বিষয়টো অৱগত কৰোৱাত আদালতে চৰকাৰক জবাবদিহি কৰে। কিন্তু জেছিপি, হাতী, বনুৱা ব্যৱহাৰ কৰি কৰা অমানবীয় উচ্ছেদকাৰ্যক গাপ দি চৰকাৰে কয় যে উক্ত লোকসকলে স্বইচ্ছাই ঠাই এৰিছে।
ইতিমধ্যে উচ্ছেদ কৰা লোকক যথোপযুক্ত ক্ষতিপূৰণ আৰু পুনৰ সংস্থাপনৰ তৎকালীন ব্যৱস্থা কৰা, অসমৰ ভূমিৰ বিজ্ঞানসন্মত জৰীপ কৰি সকলো ভূমিহীন লোককে ভূমি আবন্টন দিয়া আৰু কৃষকৰ দখলীকৃত ভূমিৰ ম্যাদী পট্টা প্ৰদান কৰা, গৰাখহনীয়াগ্ৰস্ত প্ৰতিটো পৰিয়ালকে প্ৰমাণ পত্ৰ প্ৰদান কৰাৰ দাবীত দৰং জিলাৰ উপায়ুক্তৰ জৰিয়তে অসমৰ মাননীয় মুখ্যমন্ত্ৰী, অসম চৰকাৰৰ ৰাজহ আৰু দুৰ্যোগ ব্যৱস্থাপনা বিভাগৰ মাননীয় মন্ত্ৰী, অতিৰিক্ত মুখ্য সচিব, প্ৰধান সচিব, দৰং জিলা উপায়ুক্ত, ছিপাঝাৰ আৰু মঙ্গলদৈ ৰাজহ চক্ৰ বিষয়ালৈ এখন ৯ দফীয়া স্মাৰক পত্ৰ প্ৰেৰণ কৰে।
স্মাৰক পত্ৰখনত উল্লেখ কৰা আন কেতবোৰ দাবী হৈছে "Chief Minister's Special Scheme for Rehabilitation of Erosion Affected Families in Assam" শীৰ্ষক আঁচনিত উল্লেখ থকা ধৰণে গৰাখহনীয়াগ্ৰস্ত সকলক ক্ষতিপূৰণ দিয়া, গৰাখহনীয়া সমস্যাৰ স্থায়ী আৰু বিজ্ঞানসন্মত সমাধান সূত্ৰৰে এই সমস্যা সমাধান কৰা, ছিপাঝাৰৰ চৰাঞ্চলত আগত দিনত কোনো ধৰণৰ উচ্ছেদৰ কাৰ্যসূচী যাতে লোৱা নহয় তাৰ নিশ্চয়তা প্ৰদান কৰা, পুলিচে শিবিৰ পাতি থকা ফুহুৰাতলীৰ প্ৰাথমিক আৰু মধ্য ইংৰাজী বিদ্যালয় দুখন এক সপ্তাহৰ সময়সীমাৰ ভিতৰত কেম্প খালি কৰি নিয়মীয়া পাঠদানৰ ব্যৱস্থা কৰা।
স্মাৰক পত্ৰখনত মায়ঙৰ উচ্ছেদিত তিনিখন বিদ্যালয়ৰ ভৱনসমূহ পুনৰ নিৰ্মাণ আৰু আন্তঃগাথঁনিৰ বাবে তৎকালীন আৰ্থ সাহাৰ্য প্ৰদান কৰা আৰু চৰাঞ্চলত বসবাস কৰা সকলক বাংলাদেশীৰ অপবাদ আৰু সন্দেহৰ পৰা মুক্তি দিবলৈ ৩০ মাৰ্চ ২০১৭ৰ ভিতৰত ৰাষ্ট্ৰীয় নাগৰিকপঞ্জীৰ কাম নির্ভুল ভাবে সম্পন্ন কৰাৰো দাবী জনোৱা হৈছে।
উল্লেখিত দাবীসমূহ অতি শীঘ্ৰে কাৰ্যকৰীকৰণৰ পদক্ষেপ গ্ৰহণ নকৰিলে উচ্ছেদ বিৰোধী গণ মঞ্চই অসমৰ সকলো উচ্ছেদিত লোক আৰু গৰাখহনীয়া পীড়িত ভূমিহীন লোকসকলক লৈ ৰাজ্যজুৰি তীব্ৰ গণ আন্দোলন গঢ়ি তুলিব বুলিও হুংকাৰ দিয়ে।