কোকৰাঝাৰঃ উত্তৰ প্ৰদেশৰ মুখ্যমন্ত্ৰী যোগী আদিত্য নাথ, বিজেপিৰ ৰাষ্ট্ৰীয় সভাপতি অমিত শ্বাহ আৰু তেজপুৰৰ সাংসদ ৰাম প্ৰসাদ শৰ্মাৰ বিৰুদ্ধে সোচ্ছাৰ হৈ উঠিছে সদৌ অসম আদিবাসী ছাত্ৰ সন্থা চমুকৈ আছা।ছচিয়েল মিডিয়াত আদিবাসী যুৱতী লক্ষী ওৰাঙৰ আপত্তিজনক ফটো উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ নামত থকা ফে'চবুকৰ পেজত আপলোড কৰা আৰু পোষ্টকে সাংসদ আৰ পি শৰ্মাই শ্বেয়াৰ কৰাৰ প্ৰতিবাদতে আছাই ৰাজ্যজুৰি প্ৰতিবাদ সাব্যস্ত কৰি আহিছে।
ইয়াৰ অংশস্বৰূপে আজি কোকৰাঝাৰৰ মাগুৰমাৰীত আছাই উত্তৰ প্ৰদেশৰ মুখ্যমন্ত্ৰী আৰু সাংসদ গৰাকীৰ পুত্তলিকা দাহ কৰে ৷ আছাৰ কেবাশতাধিক নেতা-কৰ্মীয়ে আজি দুপৰীয়া ১২ বজাত কোকৰাঝাৰস্থিত মাগুৰমাৰীত পুত্তলিকা দাহ কাৰ্যসূচীত অংশ গ্ৰহণ কৰি যোগী আদিত্য নাথ মুৰ্দাবাদ,আৰপি শৰ্মা মুৰ্দাবাদ , বিজেপি হুচিয়াৰ , অমিত শ্বাহ হায় হায় , আদিবাসীক লৈ ৰাজনীতি বন্ধ কৰক আদি ইত্যাদি শ্লোগানেৰে পৰিৱেশ উত্তাল কৰি তোলে৷
আছাৰ সভাপতি ষ্টীফেন লাক্ৰাই তীব্ৰ প্ৰতিক্ৰিয়া প্ৰকাশ কৰি কয় যে আদিবাসী যুৱতী হোৱাৰ বাবেই লক্ষী ওৰাঙক ৰাজনৈতিক নেতাই বাৰে বাৰে নাঙঠ কৰি আহিছে ৷ ২০০৭ চনৰ ২৪ নৱেম্বৰত আদিবাসী জনগোষ্ঠীক জনজাতিকৰণৰ দাবীত আছাই গুৱাহাটীৰ বেলতলাত উলিওৱা সমদলত অংশগ্ৰহণ কৰি আদিবাসী যুৱতী লক্ষী ওৰাঙ নিৰ্যাতিতা হৈছিল। সম্প্ৰতি বিশ্বনাথৰ জপৌবাৰীৰ এটা জুপুৰী ঘৰত স্বামী আৰু সন্তানসহ দুৰ্বিষহ জীৱন অতিবাহিত কৰা দুৰ্ভগীয়া এই মহিলাগৰাকীয়ে সেই ভয়াবহ কলা দিনটোৰ কথা পাহৰিবলৈ চেষ্টা কৰিছে যদিও ৰাজনৈতিক নেতাসকলে বেলতলা কাণ্ডৰ সেই দৃশ্য সমূহ বাৰে বাৰে ৰাজনৈতিক আহিলা হিচাবে ব্যৱহাৰ কৰি আহিছে বুলি উল্লেখ কৰে আছাৰ সভাপতি ষ্টীফেন লাক্ৰাই৷
কংগ্ৰেছ চৰকাৰৰ শাসনকালত সংঘটিত হোৱা সেই ভয়াৱহ ঘটনাটোক বিজেপিয়ে প্ৰচাৰ চলাই লক্ষী ওৰাঙক পুনৰবাৰৰ বাবে বিজেপিয়ে নিৰ্যাতন কৰিলে বুলি মন্তব্য কৰি ষ্টীফেন লাক্ৰাই আদিবাসী জনগোষ্ঠীক লৈ ৰাজনীতি নকৰিবলৈ বিজেপিক সকীয়াই দিয়ে। আজিৰ পুত্তলিকা দাহ কাৰ্যসূচীত আছাৰ কোকৰাঝাৰ জিলা সভাপতি ছেলিম মিঞ্জ সহিতে বহুসংখ্যক নেতা কৰ্মী উপস্থিত আছিল।
উল্লেখ্য যে বেলতলা কাণ্ডৰ নিৰ্যাতিতা লক্ষী ওৰাঙে তেওঁৰ আপত্তিজনক ফটো উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ নামত থকা ফে'চবুকৰ পেজত আপলোড কৰা আৰু সেই পেজকে সাংসদ আৰ পি শৰ্মাই শ্বেয়াৰ কৰাৰ প্ৰতিবাদত কালি বিশ্বনাথ মহকুমা ন্যায়িক দণ্ডাধীশৰ আদালতত দুয়োজনৰ বিৰুদ্ধে গোচৰ তৰে। ইফালে উত্তৰ প্ৰদেশৰ আৰক্ষীয়ে উক্ত পেজটো মুখ্যমন্ত্ৰী যোগী আদিত্যনাথৰ নহয় বুলি অসম আৰক্ষীক অৱগত কৰা বুলি সদৰী কৰিছে অসম আৰক্ষীৰ অতিৰিক্ত আৰক্ষী সঞ্চালকপ্ৰধান পল্লৱ ভট্টাচাৰ্যই।