নতুন দিল্লীঃ এখন ৰঙা ৰঙৰ মাৰুতি ইক’ কাৰ! চি আৰ পি এফ ৫৭ খন বাছৰ বৃহৎ কনভয়ৰ সমান্তৰালকৈ বাওঁ দিশেৰে গতি কৰিছে এখন ৰঙা ৰঙৰ ইক’ গাড়ী৷ চি আৰ পি এফৰ ৩ নং বাছখনত থকা নিৰাপত্তাৰক্ষীয়ে অতি কমেও দুই-তিনিবাৰ ইক’ গাড়ীখনৰ চালকক আঁতৰি যাবলৈ চলন্ত বাছৰপৰাই নিৰ্দেশ দিছিল৷

কিন্তু চালকজনে নিৰাপত্তাৰক্ষীজনৰ কথাত গুৰুত্ব নিদি গাড়ীখন এবাৰ কনভয়ৰ ওচৰলৈ আনিছে আৰু এবাৰ আঁতৰাই লৈ গৈছে৷ এনেদৰে ইক’ ভেনখনৰ চালকজনে এক-দুই মিনিট গাড়ীখন ঢলং-পলংকৈ চলাই অৱশেষত তাৰ অসৎ উদ্দ্যেশ্য সফল কৰে৷

ইক’ ভেনখনে কনভয়ৰ পঞ্চমখনত বাছত খুন্দা মাৰি বৃহৎ বিস্ফোৰণ ঘটায়৷ লগে লগে নিথৰ হৈ পৰে ৪২ জন বীৰ জোৱানৰ শৰীৰ৷

ৰাষ্ট্ৰীয় তদন্তকাৰী সংস্থা, চমুকৈ ‘নিয়া’ৰ সূত্ৰই প্ৰকাশ কৰিছে যে সন্ত্ৰাসবাদী সংগঠন জইছ-ই-মহম্মদৰ আত্মঘাতী বোমাৰু আদিল আহমেদ ধৰে চলাই নিয়া গাড়ীখনৰ চিচি টিভি ফুটেজ সংগ্ৰহ কৰিবলৈ সক্ষম হৈছে৷ 

ফুটেজৰ ভিত্তিতে নিয়াই গাড়ীখনৰ গৰাকীকো চিনাক্ত কৰিছে৷ যোৱা ১৪ ফেব্ৰুৱাৰীত সংঘটিত বোমা আক্ৰমণৰ পাছৰপৰা গাড়ীখনৰ মালিকজন পলাতক হৈ আছে৷ ২০১০-১১ মডেলৰ গাড়ীখন নতুনকৈ ৰং কৰা বুলি সন্দেহ কৰা হৈছে৷ 

উল্লেখ্য যে, চি আৰ পি এফৰ ৭৬ নম্বৰ বেটেলিয়নে ছুটীৰ পাছত শ্ৰীনগৰলৈ কামত যোগদানৰ বাবে আহি আছিল৷ জম্মুৰপৰা তেওঁলোকে পুৱতি নিশা ২ বাজি ৩৩ মিনিটত যাত্ৰা আৰম্ভ কৰিছিল৷ শ্ৰীনগৰ পাবলৈ মাত্ৰ ২৭ কিল’মিটাৰ থকাৰ সময়তে সন্ত্ৰাসবাদীয়ে আক্ৰমণ চলাইছিল৷