পুৰণিগুদামঃ নগাঁও জিলাৰ বঢ়মপুৰৰ নিকটৱৰ্তী পাৰুলবালা গোস্বামী বামুনী বৰবাৰী উচ্চ মাধ্যমিক বিদ্যালয়ত শুকুৰবাৰে এখন বিদায় সম্বৰ্ধনা সভা অনুষ্ঠিত হৈ যায়।
বিদ্যালয়খনৰ প্ৰধান শিক্ষক ললিত চন্দ্ৰ শইকীয়াই যোৱা ২০১৮ বৰ্ষৰ অক্টোৱৰ মাহৰ ৩১ তাৰিখে অৱসৰ গ্ৰহণ কৰিছিল যদিও তেওঁক আজিহে বিদ্যালয়খনৰ তৰফৰপৰা আনুষ্ঠানিকভাৱে বিদায় সম্বৰ্ধনা জনোৱা হয়।
বিদ্যালয়খনৰ পৰিচালনা সমিতিৰ সভানেত্ৰী নিভা গগৈৰ সভাপতিত্ব অনুষ্ঠিত হোৱা সভাখনত অতি পিছপৰা অঞ্চলৰ বিদ্যালয়খনৰ প্ৰধান শিক্ষক হিচাবে বিগত সময়ত কাৰ্যনিবাহ কৰা সময়খিনিৰ ওপৰত বিদায়ী প্ৰধান শিক্ষক ললিত চন্দ্ৰ শইকীয়াই বক্তব্য প্ৰদান কৰাৰ লগতে সভাখনত বৰ্তমান বিদ্যালয়খনৰ প্ৰধান শিক্ষক জগত জ্যোতি বৰা, পৰিচালনা সমিতিৰ বিষয়বৱীয়া সুৰেন গোৱালা আৰু সন্ধ্যা বসুমতাৰী উপস্থিত থকাৰ উপৰিও শিক্ষক-শিক্ষয়ত্ৰী হিমানী গোস্বামী, ভানু হাজৰিকা, দীপক চন্দ্ৰ বৰা, অনিমা কলিতা, পিংকু বৰা, সবিতা পাঠক আৰু অমৃতা শইকীয়াই ব্যক্তব্য প্ৰদান কৰে।
উল্লেখ্য যে বিদ্যালয়খনৰ তৰফৰপৰা বিদায়ী প্ৰধান শিক্ষকগৰাকীক এখন গামোচা, সম্বৰ্ধনা-পত্ৰ, এখন পুথি, বস্ত্ৰ আৰু শৰাই আদিৰে বিদায় সম্বৰ্ধনা জনোৱা হয়।