পুৰণিগুদামঃ নগাঁৱৰ পুৰণিগুদামৰ চলচলিত শনিবাৰে পুৱাতে অনিয়মীয়া শিক্ষাদানক কেন্দ্ৰ কৰি সৃষ্টি হয় এক উত্তপ্ত পৰিস্থিতি।
স্থানীয় ৰাইজে ৪৮৩ নং চলচলি বালক মোক্তাৱ বিদ্যালয়লৈ শিক্ষক-শিক্ষয়িত্ৰী পলমকৈ অহাৰ অভিযোগ তুলি বিদ্যালয়খনৰ গে’টত তলা বন্ধ কৰি সাব্যস্ত কৰে প্ৰতিবাদ।
প্ৰায়েই বিদ্যালয়ত অনিয়মীয়া শিক্ষাদান আৰু শনিবাৰে দুপৰীয়া পৰ্যন্ত শিক্ষক-শিক্ষয়িত্ৰীয়ে বিদ্যালয় বন্ধ ৰখাৰ অভিযোগ তুলি স্থানীয় ৰাইজে এই কাৰ্যসূচী হাতত লয়।
ইয়াৰোপৰি স্থানীয় ৰাইজে ৪৮৩ নং চলচলি বালক বিদ্যালয়ৰ তলা বন্ধ কৰাৰ লগতে এগৰাকী শিক্ষয়িত্ৰীক আবদ্ধ কৰি ৰখাৰ উপৰিও বিদ্যালয়খনৰ ঠিক সন্মুখতে থকা ৬৫৯ নং চলচলি বালিকা মোক্তাৱ বিদ্যালয়ৰো দুগৰাকী শিক্ষয়িত্ৰীত পলমকৈ অহাৰ অভিযোগ তুলি বিদ্যালয়ৰ সন্মুখতে বহু সময় ধৰি আৱদ্ধ কৰি ৰাখে।
ইফালে ৪৮৩ নং চলচলি বালক বিদ্যালয়ৰ দুগৰাকী শিক্ষয়িত্ৰীয়ে কাৰ্যনিবাহ কৰি থকাৰ বিপৰীতে অনলাইনযোগে বিদ্যালয়খনত ৪ গৰাকী শিক্ষক-শিক্ষয়িত্ৰী দেখুৱাই থকাক লৈ আৰ্শ্চয প্ৰকাশ কৰাৰ লগতে অনলাইনৰ ৪ গৰাকী শিক্ষক-শিক্ষয়িত্ৰীৰ দুগৰাকী শিক্ষক-শিক্ষয়িত্ৰী ক'লৈ গ'ল বুলি ৰূপহী শিক্ষা খণ্ড বিষয়া গৰাকীক বাৰে বাৰে জনাই অহাৰ পাছতো বিষয়াগৰাকীয়ে ৰহস্যজনকভাৱে কোনো ব্যৱস্থা গ্ৰহণ নকৰাত স্থানীয় ৰাইজ বিষয়াগৰাকীৰ ওপৰতো অসন্তুষ্ট হৈ পৰে।
আনহাতে আন একাংশই ৰূপহী শিক্ষা খণ্ড বিষয়াগৰাকীয়ে সন্দেহজনকভাৱে কোনো বুজাবুজিৰ বিনিময়তে ব্যাপক খেলি-মেলি কৰি থকা বুলি সংবাদ মাধ্যমৰ আগত অভিযোগ কৰে একাংশ ৰাইজে।
উল্লেখ্য যে, সমগ্ৰ ঘটনাৰ সন্দৰ্ভত শিক্ষক-শিক্ষয়িত্ৰীসকলৰ বিৰুদ্ধে থকা সকলো অভিযোগ একেমুখেই নস্যাৎ কৰে শিক্ষক-শিক্ষয়িত্ৰীসকলৰ লগতে স্থানীয় আন একাংশ লোকেও। আনহাতে ৰাইজে কণ-কণ ছাত্ৰ-ছাত্ৰীসকলৰ শৈক্ষিক জীৱনক লৈ হেতালি খেলা এই সকল শিক্ষক-শিক্ষয়িত্ৰীৰ ওপৰত শিক্ষামন্ত্ৰী সিদ্ধাৰ্থ ভট্টাচাৰ্যক বিহিত ব্যৱস্থা গ্ৰহণ কৰাৰ লগতে প্ৰতিখন বিদ্যালয়তে পাঞ্চিং মেচিনৰ ব্যৱস্থা কৰিবলৈও দাবী জনায় অঞ্চলটোৰ সচেতন মহলে।