গোৰেশ্বৰঃ সংগ্ৰামী সত্বাৰ অধিকাৰী, ঐক্য আৰু সমন্বয়ৰ প্ৰতীক, সৰ্বহাৰা, কৃষক শ্ৰমিকৰ মুকুতিৰ হকে ৰণ দিয়া বিপ্লবী প্ৰাণ, সৈনিক শিল্পী বিষ্ণুৰাভাক আজি বাগসা জিলাৰ গোৰেশ্বৰত সশ্ৰদ্ধ সোঁৱৰণ কৰা হয়।
অসমীয়া জাতীয় জীৱনলৈ অনবদ্য অৱদান আগবঢ়োৱা বিষ্ণুৰাভাক জীৱন দৰ্শন আৰু আদৰ্শৰে অনুপ্ৰাণিত কেইবাটাও অনুষ্ঠান-প্ৰতিষ্ঠানে আজি বিষ্ণু ৰাভা দিৱস পালনেৰে কবি- গীতিকাৰ-চিত্ৰশিল্পী তথা গভীৰ শিল্পী সত্বাৰ অধিকাৰী বিষ্ণুৰাভাক গীত-মাত-নৃত্য আৰু সাংস্কৃতিক অনুষ্ঠানৰে গভীৰ শ্ৰদ্ধাঞ্জলি অৰ্পণ কৰা হয়।
গোৰেশ্বৰত ভাৰতীয় গণনাট্য সংঘ গোৰেশ্বৰ শাখা আৰু ভাৰতৰ ছাত্ৰ ফেডাৰেছন গোৰেশ্বৰ আঞ্চলিক সমিতিৰ উদ্যোগত আজি গোৰেশ্বৰ চিপিআই এম কাৰ্যালয়ৰ সম্মুখত ৰাভা দিৱস উপলক্ষে বিভিন্ন কাৰ্যসূচী অনুষ্ঠিত কৰা হয়। বিষ্ণুৰাভাৰ প্ৰতিচ্ছবিত মাল্যাৰ্পন কৰে কৃষক নেতা কৰুণা ভূঞাই। বন্তি প্রজ্বলন কৰে গণশিল্পী ঘন ডেকাই।
ভাৰতৰ ছাত্ৰ ফেডাৰেছনৰ ৰাজ্যিক সম্পাদক নিৰংকুশ নাথে ৰাভাৰ জীৱন দৰ্শন সম্পৰ্কে ব্যাখ্যা আগবঢ়াই কয় যে-বৰ্তমান সময়ত জাতি-ধৰ্মৰ ৰাজনীতি কৰি সমাজখনক ভাগ ভাগ কৰাতকৈ অন্ন-বস্ত্ৰ-বাসস্থানৰহে ৰাজনীতি কৰিব লাগে।
বৰ্তমান এচামে মানুহক ভাত-কাপোৰ দিব পৰা নাই কিন্তু জাতি-ধৰ্মৰ নামত মানুহক ভাগ ভাগ কৰাৰহে ৰাজনীতি কৰি আহিছে। বিষ্ণুৰাভাই জাতি-ধৰ্মৰ ৰাজনীতি নকৰি ভাত কাপোৰৰ ৰাজনীতি কৰি সৰ্বসাধাৰণক আগবঢ়াই নিয়াৰ সপোন ৰচিছিল বুলি মন্তব্য আগবঢ়াই সম্পাদক নিৰংকুশ নাথে।
অনুষ্ঠানত নবীন-প্ৰবীন শিল্পীসকলে বিভিন্ন গীত-মাত-নৃত্যানুষ্ঠান লগতে গণশিল্পী ঘন ডেকাই সংগীতানুষ্ঠান পৰিবেশন কৰে। ইপিনে স্থানীয় কেবাখনো শিক্ষানুষ্ঠানৰ লগতে গোৰেশ্বৰ ৰামছা গাঁওত মেদিনী চোধুৰী সোঁৱৰণী মঞ্চতো ৰাভা দিৱস পালন কৰা হয়।