মিছামাৰীঃ শোণিতপুৰৰ মিছামাৰী আৰক্ষী থানাৰ অন্তৰ্গত বনগাওঁ ৰূপাঞ্জলিৰ পৰা আজি আবেলি আৰক্ষীয়ে এগৰাকী ১৩ বছৰীয়া ছাত্ৰীক ধৰ্ষণ কৰাৰ অভিযোগত লম্পট দুই ভাতৃক গ্ৰেপ্তাৰ কৰে। আটকাধীন লম্পট ভাতৃদ্বয় হৈছে ঠাকুৰ প্ৰসাদ বিশ্বকৰ্মা আৰু জামুন বিশ্বকৰ্মা।
দুয়োজনে আৰক্ষীৰ আগত দিয়া স্বীকাৰোক্তি অনুসৰি বিগত প্ৰায় ২০ দিন পূৰ্বে একে গাঁৱৰে বিশ্বকৰ্মা উপাধিৰ এগৰাকী ছাত্ৰীক গণেশ ৰাই নামৰ আন এজন লোকৰ সৈতে মিলি ধৰ্ষণ কৰিছিল।
ইমান দিনে বিষয়টো গাপ দি ৰাখিছিল যদিও বিষয়টো চৰ্চিত হোৱাত স্থানীয় ৰাইজে মিছামাৰী আৰক্ষী থানাত এখন এজাহাৰ দাখিল কৰে। উক্ত এজাহাৰৰ ভিত্তিত আজি আৰক্ষীয়ে তিনি লম্পটৰ ভিতৰত দুজনক আটক কৰিবলৈ সক্ষম হয়।
আনহাতে আনজন লম্পট গনেশ ৰাইক বিচাৰি নাপায় লোকজনৰ পুত্ৰ গোপাল ৰাইকে আৰক্ষীয়ে থানালৈ আনে। পিতৃৰ পাপ কৰ্মৰ বাবে পুত্ৰই এনেদৰে থানালৈ আহিবলগীয়া হোৱা ঘটনাই অঞ্চলটোত চাঞ্চল্যৰ সৃষ্টি কৰিছে।
ইফালে নিজৰ নাতিনীসম কিশোৰীগৰাকীক ধৰ্ষণ কৰা তিনি লম্পটক দৃষ্টান্তমূলক শাস্তি বিহিবলৈ দাবী জনাইছে স্থানীয় ৰাইজে। অন্যাথা ৰাইজে নিজাববীয়াকৈ বিচাৰ কৰিবলৈ বাধ্য হ'ব বুলি সকীয়াই দিয়ে।