বাইহাটা চাৰিআলিঃ কামৰূপ গ্ৰাম্য জিলাৰ বেজেৰাত ১৫নং ৰাষ্ট্ৰীয় ঘাই পথত সংঘটিত এক দুৰ্ঘটনাত এজন যুৱক নিহত হোৱাৰ লগতে আন এজন আহত হয়।
ঘটনাৰ বিৱৰণী মতে আজি আবেলি ৪.৩০ বজাত গুৱাহাটীৰ পৰা ছিপাঝাৰ অভিমুখে দুজন যুৱক আহি থকা অৱস্থাত বেজেৰাৰ খেহেনীপাৰাত এখন টেম্প’ক অতিক্রম কৰিবলৈ লওঁতে পিছ ফালৰ পৰা অহা এখন মালবাহী গাড়ীয়ে খুন্দিওৱাৰ ফলত দুয়োজন যুৱক পথৰ ওপৰত ছিটিকি পৰে।
তেনেতে গুৱাহাটী অভিমুখী তীব্ৰবেগী আল্ট্ৰা বাছ এখনে দুয়োজন যুৱককে মহটিয়াই লৈ যায়। ফলত দৰং জিলাৰ দলংঘাটৰ যুৱক শ্যাম কুমাৰ চেত্ৰী থিতাতে নিহত হোৱাৰ লগতে ছিপাঝাৰ হাজৰিকাপাৰাৰ দেৱানন্দ সত্ৰৰ কিশোৰনন্দন গোস্বামী গুৰুতৰভাৱে অাহত হয়।
পিছত আহত যুৱকজনক মুমূৰ্ষু অৱস্থাত জি এম চি এইচলৈ প্ৰেৰণ কৰে। আনহাতে দুয়োখন গাড়ীয়ে দুৰ্ঘটনা সংঘটিত কৰি পলায়ন কৰে বুলি জানিব পৰা গৈছে।
উল্লেখ্য, নিহত শ্যাম কুমাৰ চেত্ৰী এমাহ আগতে বিবাহপাশত আবদ্ধ হৈছিল। এই শোকাৱহ ঘটনাই দলংঘাট অঞ্চলত শোকৰ ছাঁ পেলাইছে।