তেজপুৰঃ অৱশেষত ৰাজপথলৈ ওলাই আহিল মিলনপুৰৰ ৰাইজ৷ ৰাইজৰ আহ্বান তথা অনুৰোধক গুৰুত্ব নিদিয়া চৰকাৰৰ বিৰুদ্ধে ৰাজপথলৈ ওলাই আহিবলৈ বাধ্য হয় ক্ষোভিত মিলনপুৰৰ ৰাইজ৷
তেজপুৰৰ মিলনপুৰৰ ৰাইজে দীৰ্ঘদিনধৰি তেজপুৰ-ৰঙাপৰা গড়কাপ্তানি পথ মেৰামতি কৰাৰ দাবী জনাই আহিছিল যদিও চৰকাৰে গুৰুত্ব আৰোপ নকৰাৰ অভিযোগ উত্থাপন কৰি আজি পুৱাই সদৌ অসম জাতীয়তাবাদী যুৱ সন্মিলনৰ তেজপুৰ জিলা সমিতিৰ সহযোগত পথটো অৱৰোধেৰে প্ৰতিবাদ সাব্যস্ত কৰে৷
পথটোৰ জৰাজীৰ্ণ অৱস্থাই সৰ্বসাধাৰণ লোকক জ্বলাকলা খুৱাই আহিছে। ৰাইজৰ দাবীক আওকান কৰাত ক্ষোভিত লোকসকলে আজি গড়কাপ্তানী বিভাগৰ প্ৰতিকী শৱ পথত থৈ কান্দি প্ৰতিবাদ জনায় ৰাইজে। প্ৰতিবাদৰ ফলত পথটোত জান-যঁটৰ সৃষ্টি হয়।
তেজপুৰ সমষ্টিৰ বিধায়ক বৃন্দাবন গোস্বামীকো অকৰ্মণ্য আখ্যা দি বৃন্দাবন গোস্বামীৰো প্ৰতিকৃতি দাহ কৰে প্ৰতিবাদকাৰীসকলে। এসপ্তাহৰ ভিতৰত মেৰামতিৰ কাম আৰম্ভ নকৰিলে পথত গা’ত খান্দাৰ ভাবুকি প্ৰদান কৰে প্ৰতিবাদকাৰীসকলে। ৰাজহ চক্ৰ বিষয়া আৰু আৰক্ষী উপ-অধীক্ষক প্ৰতিবাদস্থলীত উপস্থিত হৈ ৰাইজক পথ মেৰামতিৰ আশ্বাস দিয়াত হে ৰাইজ ক্ষান্ত হয়৷