বোকাজানঃ একেখন ঘৰৰ পৰা দুখনকৈ মটৰচাইকেল চুৰি৷ সেয়াও এলা-পেছা মটৰ চাইকেল নহয় ৷ চোৰে নিছে আভিজাত্যৰ চিন স্বৰূপ ডাঙৰ শব্দৰ মটৰচাইকেল ৰয়েল এনফিল্ড৷
বোকাজান নগৰৰ ২ নং ৱাৰ্ডৰ চন্দ্ৰপুৰৰ বাসিন্দা সঞ্জয় গুপ্তাৰ বাসগৃহৰ পৰা সোমবাৰে নিশা চোৰে দুখনকৈ ৰয়েল এনফিল্ড মটৰচাইকেল চুৰি কৰি নিয়ে৷
ঘটনাৰ বিৱৰণী অনুসৰি সঞ্জয় গুপ্তাৰ মালিকীস্বত্বৰ ৰয়েল এনফিল্ড ইছান মটৰছৰ নামত থকা এ-এছ-০৯-ই-৬০৪৫ আৰু এ-এছ-০৯-ই-৬০৫১ নম্বৰৰ মটৰচাইকেল দুখন কালি সন্ধিয়া শ্ব’ৰুম বন্ধ হোৱাৰ পাছত সঞ্জয় গুপ্তাই চন্দ্ৰপুৰস্থিত নিজ বাসগৃহলৈ লৈ যায় ৷
কিন্ত কালি নিশা চোৰে গুপ্তাৰ বাসগৃহৰ গেটৰ তলা ভাঙি মটৰচাইকেল দুখন চুৰ কৰি নিয়ে৷ ইতিমধ্য উক্ত মটৰচাইকেল চুৰি সন্দৰ্ভত সঞ্জয় গুপ্তাই আজি বোকাজান আৰক্ষী থানাত এক এজাহাৰ দাখিল কৰিছে৷ আৰক্ষীয়ে তদন্ত অব্যাহত ৰাখিছে যদিও বৰ্তমানলৈকে মটৰ চাইকেল দুখনৰ কোনো শুংসূত্ৰ উলিয়াব পৰা নাই৷