চামগুৰিঃ ৰঙৰ উৎসৱ ফাকুৱাৰ আনন্দৰ মাজতে চামগুৰিৰ আমনিত অকাল মৃত্যুক সাবতিবলগীয়া হ'ল এজন যুৱকে। চামগুৰিৰ আমনিত শুকুৰবাৰে বিয়লি সংঘটিত এক শোকাৱহ পথ দুৰ্ঘটনাই ম্লান কৰিলে সমগ্ৰ অঞ্চলটোতে উদযাপিত আবিৰৰ মাদকতা। 

বিয়লি আমনিৰপৰা চামগুৰি অভিমুখি AS-01BL-0442 নম্বৰৰ এখন পালচাৰ বাইকে নিয়ন্ত্ৰণ হেৰুৱাই পথৰ ডিভাইদাৰত খুন্দিওৱাৰ ফলত সংঘটিত হয় পথ দূৰ্ঘটনাটো। 

ভয়াৱহ দুৰ্ঘটনাটোত থিতাতে নিহত হয় বাইক আৰোহী শম্ভূ মুণ্ডা। ইফালে, গুৰুতৰভাৱে আহত হয় সহ-আৰোহী বিকি চাহা নামৰ আন এজন যুৱক। আহত বিকিক সংকতজনক অৱস্থাত ততাতৈয়াকৈ উন্নত চিকিৎসাৰ বাবে গুৱাহাটীলৈ প্ৰেৰণ কৰা হয়। উল্লেখ্য যে, নিহত শম্ভূ মুণ্ডা আৰু আহত বিকি চাহাৰ ঘৰ আমনিৰ দিজুবস্তীত বুলি জানিব পৰা গৈছে।