ষড়ানন বৰা,চামগুৰিঃ ৰূপহীহাট বিধানসভা সমষ্টিৰ অন্তৰ্গত নগাঁৱৰ কঢ়ালী গাৱঁত ভাৰতীয় জনতা পাৰ্টিৰ ৰূপহীহাট সমষ্টিৰ উদ্যোগত দেওবাৰে দুপৰীয়া অনুষ্ঠিত হয় বিজেপিৰ এখন দলীয় সংগঠন পৰ্ব আৰু সদস্যতা অভিযান সভা। এই অভিযান অংশ গ্ৰহন কৰে বিজেপি দলৰ ৰাজ্যিক সভাপতি ৰঞ্জিত কুমাৰ দাসৰ লগতে কলিয়াবৰ জিলা বিজেপিৰ সভাপতি অনিল শইকীয়াকে আদি কৰি নগাঁও সদৰ সমষ্টিৰ বিধায়ক ৰূপক শৰ্মা, বিজেপিৰ সংখ্যালঘূ নেতা মোক্তাৰ হুছেইন খানসহ দলৰ কেইবাজনো জ্যেষ্ঠ নেতাই।
কিন্তু প্ৰায় পাচ সহস্ৰাধিক কৰ্মী-সমৰ্থকে ভৰি থকা সভাখনত অতি আশ্চৰ্যজনকভাৱে বিজেপিৰ ৰাজ্যিক সভাপতি গৰাকীয়ে ভাষণ আৰম্ভ কৰাৰ আগে আগে প্ৰায় খালি হৈ পৰে একাধিক আসন। বিজেপিৰ সদস্যতা অভিযান সভা আধাতে এৰি সভাস্থলিৰপৰা ৰাওনা হয় প্ৰায় আধা সংখ্যক সভাখনত সমবেত হোৱা দলীয় কৰ্মী-সমৰ্থক। অৱশ্যে নগাঁও সদৰ সমষ্টিৰ বিধায়ক ৰূপক শৰ্মাই প্ৰদান কৰা ভাষণৰ অন্তত সভাখনত শেহতীয়াকৈ ভাষণ আৰম্ভ কৰে ৰাজ্যিক সভাপতি ৰঞ্জিত কুমাৰ দাসে।