ডিজিটেল ৰিপ'ৰ্টঃ বহু বছৰজোৰা আইনী যুঁজ-বাগৰৰ অন্তত ন্যায় লাভ কৰিলে সাংবাদিকসকলে৷ ন্যায়াধীশ মাঝিথিয়া দৰমহা ব’ৰ্ডৰ পৰামৰ্শাৱলী আখৰে আখৰে ৰূপায়নৰ কঠোৰ নিৰ্দেশ জাৰি কৰিছে উচ্চতম ন্যায়ালয়ে৷

♦ ন্যায়াধীশ গগৈলৈ সংগ্ৰামী সাংবাদিকৰ কৃতজ্ঞতা

♦ হতাশ, বিমৰ্ষ সংবাদ পত্ৰৰ মালিক গোষ্ঠী

♦ বন্ধ হ'ব পাৰে একাংশ আগশাৰীৰ সংবাদ পত্ৰ

কালি ন্যায়াধীশ ৰঞ্জন গগৈৰ নেতৃত্বত গঠিত এখন দুজনীয়া বিচাৰপীঠে দৰমহা ব’ৰ্ডখনৰ পৰামৰ্শাৱলী এনেদৰে ৰূপায়ন কৰিবলৈ সংবাদপত্ৰসমূহৰ মালিক গোষ্ঠীক নিৰ্দেশ দিয়ে৷ অল ইণ্ডিয়া ৱ’ৰ্কিং জার্ণেলিষ্ট ফেডাৰেচনৰ আবেদনৰ ভিত্তিত ৰুজু হোৱা এটা গোচৰৰ শুনানী গ্ৰহণৰ অন্তত যোৱা তিনি মে’ত বিচাৰপীঠখনে ৰায়দান সংৰক্ষিত কৰি ৰাখে৷ অৱশেষত কালি গোচৰটোৰ ৰায়দান কৰা হয়৷ এনে এক ৰায়ৰ বাবে ন্যায়াধীশ গগৈলৈ কৃতজ্ঞতা জ্ঞাপন কৰিছে দেশৰ সংগ্ৰামী সাংবাদিকসকলে।

অৱশ্যে বহু সংবাদ পত্ৰ গোষ্ঠীয়ে মাঝিথিয়া দৰমহা আয়োগৰ হাৰত কৰ্মচাৰীক দৰমহা দিবলৈ অপাৰগতা প্ৰকাশ কৰি আহিছে। এই বিষয়ে উচ্চতম ন্যায়ালয়কো অৱগত কৰা হৈছিল যদিও ন্যায়ালয়ে সেই যুক্তি গ্ৰহণ নকৰিলে।

উল্লেখ্য যে তদানীন্তন ইউ পি এ চৰকাৰে ২০০৭-ত ন্যায়াধীশ মাঝিথিয়া দৰমহা ব’ৰ্ড গঠন কৰিছিল৷ ইয়াৰ চাৰি বছৰৰ অন্তত দৰমহা ব’ৰ্ডখনে পৰামৰ্শাৱলী চৰকাৰৰ ওচৰত দাখিল কৰে৷ পৰৱৰ্তী সময়ত তদানীন্তন কেন্দ্ৰীয় কেবিনেটে  দৰমহা ব’ৰ্ডৰ পৰামৰ্শাৱলী গ্ৰহণ কৰে৷

কিন্তু দেশৰ অধিকাংশ সংবাদপত্ৰ গোষ্ঠীয়ে  দৰমহা ব’ৰ্ডৰ পৰামৰ্শাৱলী কাৰ্যকৰী কৰাৰ পৰা বিৰত থকাত ২০১৪ উচ্চতম ন্যায়ালয়ে এই সম্পৰ্কীয় এটা গোচৰৰ আধাৰত শীঘ্ৰে  দৰমহা ব’ৰ্ডৰ পৰামৰ্শাৱলী ২০১১-ৰ পৰা কাৰ্যকৰীকৰণৰ নিৰ্দেশ জাৰি কৰে৷ তেতিয়াও বহু সংবাদপত্ৰ গোষ্ঠীয়ে  দৰমহা ব’ৰ্ডৰ পৰামৰ্শাৱলী কাৰ্যকৰী নকৰাত অল ইণ্ডিয়া ৱ’ৰ্কিং জার্ণেলিষ্ট ফেডাৰেচন উচ্চতম ন্যায়ালয়ৰ দ্বাৰস্থ হয়৷ 

ইফালে, ন্যায়ালয়ৰ এই নিৰ্দেশক লৈ সমগ্ৰ দেশৰ লগতে অসমৰো বিভিন্ন সংবাদ পত্ৰৰ মালিক গোষ্ঠীৰ মাজত হতাশাৰ সৃষ্টি হৈছে। আনকি হিন্দুস্তান টাইমছ, দ্য টেলিগ্ৰাফ, টাইমছ অৱ ইণ্ডিয়া আদিৰ দৰে ৰাষ্ট্ৰীয় সংবাদ পত্ৰ গোষ্ঠীয়ে কৰ্মচাৰী ছাটাইৰ দৰে কঠোৰ সিদ্ধান্তও গ্ৰহণ কৰি আহিছে। বিপৰীতে ইয়াৰ ব্যতিক্ৰম হিচাপে অসমৰ আছাম ট্ৰিবিউন আৰু দৈনিক গোষ্ঠীয়ে আৰম্ভণিৰে পৰা মাঝিথিয়া দৰমহা আয়োগৰ হাৰত কৰ্মচাৰীক দৰমহা আদায় দি আহিছে।

সম্প্ৰতি অসমীয়া প্ৰতিদিন, দৈনিক জনমভূমি গোষ্ঠীকে ধৰি ৰাজ্যখনৰ একাংশ সংবাদ পত্ৰ গোষ্ঠীয়ে মাঝিথিয়াৰ হাৰত দৰমহা দিবলৈ প্ৰস্তুতি চলোৱা বুলি চৰ্চা হৈছে। ইয়াৰ বাদে দৈনিক অগ্ৰদূত গোষ্ঠী, অসমীয়া খবৰ, নিয়মীয়া বাৰ্তা, আমাৰ অসম আদিৰ স্থিতি এই পৰ্যন্ত স্পষ্ট হোৱা নাই। তদুপৰি কেবাটাও সংবাদ পত্ৰ গোষ্ঠীয়ে কাকতৰ প্ৰকাশ বন্ধৰ দৰে সিদ্ধান্ত ল'বলৈও গুণা-গঁথা কৰাৰ খবৰ বিয়পিছে।

♦ Supreme Court strictly directed all the owners of print media to impliment Majithia Wage Board recommendations in toto. A divisional bench headed by Justice Ranjan Gogoi on 19th June pronounced the judgment on a case filed by All India Federation of Working Journalists.