মোৰাঝাৰঃ হোজাই জিলাৰ অন্তৰ্গত এ আই ইউ ডি এফৰ দখলত থকা যমুনামুখ সমষ্টিৰ বিন্নাকান্দি উন্নয়ন খণ্ডৰ বৰবালি আঞ্চলিক পঞ্চায়তত বিয়াগোম অনিয়মৰ অভিযোগ উত্থাপিত হৈছে।
অভিযোগ অনুসৰি চৰকাৰী কে’বাখনো আঁচনিৰ সমুদায় ধন একাংশ ক্ষমতাশালীয়ে আত্মসাৎ কৰিছে। চৰকাৰী নিৰ্দেশনা উলাই কৰি নিজৰ খেয়াল-খুচি মতে কাম কৰি লুণ্ঠনৰাজ চলোৱাৰ উপৰি জলসিঞ্চনৰ আঁচনিৰ বৃক্ষৰোপণৰ ক্ষেত্ৰতো অনিয়ম সংঘটিত হোৱাৰ অভিযোগ উত্থাপিত হৈছে।
ইয়াৰ বিৰুদ্ধে মাত মাতিলে ভাবুকি দিয়ে পঞ্চায়ত সদস্যা মমতা বেগমৰ স্বামী মেহবুব আলমে৷ লক্ষ্যণীয় যে ৰাজহুৱা দাবীৰ ভিত্তিত এবাৰ তদন্ত হয় যদিও ই ফুটুকাৰ ফেনত পৰিণত হৈছে। সম্প্ৰতি ৰাইজে পঞ্চায়তৰ বিভিন্ন আঁচনি ৰূপায়নত হোৱা অনিয়মৰ চিবিআই তদন্ত দাবী কৰিছে।