নগাঁওঃ ৰাজ্যৰ শিক্ষাৰ মানদণ্ড অধিক উন্নত কৰি তোলাৰ অৰ্থে শিক্ষা বিভাগে সময়ে সময়ে নানা ধৰণৰ পদক্ষেপ গ্ৰহণ কৰি অহাৰ বিপৰীতে শেহতীয়াভাৱে গুণোৎসৱৰ দৰে কাৰ্যসূচী ৰূপায়ণ কৰি থকাৰ সময়তে নগাঁও জিলাৰ এখন বিদ্যালয় এটা শ্ৰেণী নোহোৱাকৈ চলি থকাৰ তথ্য পোহৰলৈ আহিছে৷

প্ৰাপ্ত খবৰ মতে,জিলাখনৰ বটদ্ৰৱা সমষ্টিৰ অন্তৰ্গত ৰাইদঙীয়া অঞ্চলত আছে আশ্চৰ্যকৰ এই বিদ্যালয়খন৷ খাগৰিজান প্ৰাথমিক শিক্ষা খণ্ডই সামৰি লোৱা এই বিদ্যালয়খন হৈছে কৰচুং সত্ৰ প্ৰাথমিক বিদ্যালয় ৷ মুঠ ছয়টা শ্ৰেণী সন্নিবিষ্ট হৈ থকা এই বিদ্যালয়খনত ৪ গৰাকী শিক্ষক-শিক্ষয়িত্ৰী থকাৰ বিপৰীতে ছাত্ৰ-ছাত্ৰী আছে মাত্ৰ ১২-১৫ গৰাকীহে৷

ইয়াৰে আকৌ দুগৰাকী মান শিক্ষাৰ্থী বিদ্যালয়লৈ প্ৰায়েই নাহেই৷ কাগজে-পত্ৰই সঠিকভাৱে চলি অহা এই বিদ্যালয়খনত চলিত শিক্ষা বৰ্ষত নাই দ্বিতীয় শ্ৰেণীটো৷ অৰ্থাৎ বিদ্যালয়খন আজিৰ তাৰিখত দ্বিতীয় শ্ৰেণী নোহোৱাকৈয়েই চলি আছে৷

এই শ্ৰেণীটোত নাই এগৰাকীও ছাত্ৰ-ছাত্ৰী৷ ফলত দ্বিতীয় শ্ৰেণী বিহীনভাৱেই কৰ্তৃপক্ষই বিদ্যালয়খন চলাই নিছে৷ জানিব পৰা মতে, বিগত বৰ্ষত বিদ্যালয়খনৰ প্ৰথম শ্ৰেণীত কোনো এগৰাকী ছাত্ৰ-ছাত্ৰীয়ে নামভৰ্তি নকৰাত আৰু আন বিদ্যালয়ৰ পৰাও এই শ্ৰেণীটোলৈ কোনো ছাত্ৰ-ছাত্ৰী নতুনকৈ নহাত বৰ্তমান এই শ্ৰেণীটো ছাত্ৰ-ছাত্ৰী শূন্য হৈ ৰৈছে৷

অহা ছেপ্তেম্বৰ মাহত দ্বিতীয় পৰ্যায়ত অনুষ্ঠিত হ’বলগা গুণোৎসৱৰ প্ৰাকক্ষণত এনেদৰে নগাঁও জিলাৰ উক্ত বিদ্যালয়খন শ্ৰেণীবিহীনভাৱে চলি থকা বিষয়টোৱে বিশেষ তাৎপৰ্য বহন কৰিছে৷ গুণোৎসৱৰ পিছত এনে ধৰণৰ বিদ্যালয়ৰ পৰিৱেশ কি দৰে সলনি হয় সেয়া লক্ষণীয় দিশ হিচাপে চিহ্নিত হৈছে।