অভিজিৎ তালুকদাৰ, তামুলপুৰঃ বাক্সা জিলা তামুলপুৰৰ মহকুমাৰ ভূটান সীমান্তৰ গয়বাৰী নিশা বন্যহস্তীৰ উপদ্ৰৱ৷ নিশা তামুলপুৰ মহকুমাৰ ভাৰত-ভূটান সীমান্তৰ ভূটান সীমান্তৰ গয়বাৰীত এটা বন্য হস্তীয়ে উপদ্ৰৱ চলাই কেইবাটাও পৰিয়ালৰ বাসগৃহ ভাঙি চূৰমাৰ কৰাৰ লগতে বাৰীৰ তামোল, মালভোগ কলৰ বাগান খায় তহিলং কৰে৷

বন্যহস্তীৰ তাণ্ডৱত সম্পূৰ্ণ গৃহহীন হৈ পৰে কেইবাটাও পৰিয়াল৷ হাতীৰ আক্ৰমণত বাক্সা জিলা গোর্খা ছাত্র সন্থাৰ সাধাৰণ সম্পাদক মাধৱ ছেত্ৰী গুৰুতৰভাৱে আহত হোৱাৰ লগতে কথমপি প্ৰাণ ৰক্ষা পৰে কেইবাজনো শিশু-মহিলাসহ অসুস্থ লোকৰ৷

জানিব পৰা প্ৰতিকুল বতৰৰ মাজতে নিশা প্ৰকাণ্ড হাতীটোৱে গাঁৱখনত উপদ্ৰৱ চলায় আতংকৰ সৃষ্টি কৰে। হাতীৰ উপদ্ৰৱৰ খবৰ পোৱাৰ পাছতেই বন বিভাগৰ লোক ঘটনাস্থলীত উপস্থিত হৈ বতাহ বৰষুণৰ মাজতে আহত মাধৱ চেত্ৰীক উদ্ধাৰ কৰি তামুলপুৰ প্ৰাথমিক স্বাস্থ্য কেন্দ্ৰত আনি চিকিৎসা প্ৰদান কৰে৷

জানিব পৰা মতে মাধৱৰ ছেত্ৰীৰ ভৰিত আঠোটাকৈ চিলাইৰ লগতে শৰীৰৰ বিভিন্ন অংশত আঘাতপ্ৰাপ্ত হয়। উল্লেখ্য যে বিগত বহু দিন ধৰি হাতী জাকৰপৰা ফালৰি কাটি ফুৰা লাডেন নামৰ প্ৰকাণ্ড বন্য হস্তীটোৱে সীমান্তৱৰ্তী অঞ্চলটোত উপদ্ৰৱ চলায় আহিছে৷ হাতীৰ আক্ৰমণত আতংকিত হৈ বিনিদ্ৰ ৰজনী কটোৱা বৃহত্তৰ অঞ্চলবাসী ৰাইজে চৰকাৰ তথা বন বিভাগৰ লোকক হাতীটোৰ লগতে হাতীৰ জাকটো খেদি পঠিৱাবলৈ উপযুক্ত ব্যৱস্থা গ্ৰহণ কৰিবলৈ অনুৰোধ জনাইছে৷