তামুলপুৰঃ জম্মু-কাশ্মীৰত সন্ত্ৰাসবাদীৰ আক্ৰমণত প্ৰাণ হেৰুওৱা বীৰ শ্বহীদ মনেশ্বৰ বসুমতাৰীৰ দেওবাৰে ৰাজহুৱাভাৱে আদ্যশ্ৰাদ্ধৰ আয়োজন কৰা হৈছে। সম্পূৰ্ণ বড়ো জনগোষ্ঠীৰ ধৰ্মীয় ৰীতি-নীতিৰে পুৱাৰেপৰা আদ্যশ্ৰাদ্ধৰ কাৰ্যসূচী ৰূপায়ণ কৰা হৈছে।
বাথৌ আৰজৰে ছহিদ গৰাকীৰ প্ৰতিকৃতিত মাল্যাৰোপন কৰে তেওঁৰ অসংখ্য গুণমুগ্ধই। পুষ্পাঞ্জলি অৰ্পণৰ সময়ত ছহিদ গৰাকীৰ পত্নী, কন্যা, পুত্ৰ সহিতে আত্মীয়-স্বজন আৰু গুণমুগ্ধসকলে উচপি উঠা কৰুণ দৃশ্য দেখা যায়।
শ্ৰদ্বাঞ্জলি অনুষ্ঠান সমাপন হোৱাৰ পাছতে এক মিনিট সময় মৌন প্ৰাৰ্থনা জনাই বীৰ ছহিদ গৰাকীৰ আত্মাৰ শান্তিৰ কামনাৰে ভগৱানৰ ওচৰত প্ৰাৰ্থনা জনায়। লগে লগে আৰম্ভ হয় বাথৌ ধৰ্মীয় ৰীতিৰে আৰজ প্ৰাৰ্থনা। বীৰ ছহিদ গৰাকীৰ বাসগৃহ চৌহদ পৰিণত হয় এক পুণ্য তীৰ্থ ভূমিলৈ।
