গুৱাহাটীঃ কেন্দ্ৰীয় ৰে’ল ৰাজ্য মন্ত্ৰীৰ দৰে গুৰুত্বপূৰ্ণ পদত থকাৰ পাছতো লজ্জাজনকভাৱে যৌন কেলেংকাৰীত অভিযোক্ত হোৱা নগাঁৱৰ সাংসদ ৰাজেন গোহাঁইৰ বিৰুদ্ধ সৰব হৈছে জনতাৰ লগতে বিভিন্ন দল-সমগঠন। এইবাৰ কৃষক শ্ৰমিক উন্নয়ন পৰিষদেও মন্ত্ৰীজনৰ বিৰুদ্ধে কঠোৰ স্থিতি গ্ৰহণ কৰিছে।

মঙলবাৰে এক সংবাদ মেল সম্বোধন কৰি সংগঠটোৰ সভাপতি প্ৰদীপ কলিতাই বিস্ফোৰণ ঘটাই কয় নগাঁও লোকসভাৰ সমষ্টিৰ জীয়ৰী-বোৱাৰীসকল এতিয়া যৌন কেলেংকাৰীত জড়িত গোহাঁইৰপৰা শান্তি নোহোৱা হৈছে। দুৰ্নীতি-ভ্ৰষ্টাচাৰিৰ তথা যৌন কেলেংকাৰীত জড়িত ৰাজেন গোহাঁই বিগত চাৰিটা কাৰ্যকাল নগাঁও লোকসভা সমষ্টিৰপৰা সাংসদ হিচাপে নিৰ্বাচিত হ’ল। কিন্তু চাৰিটা বছৰে ভ্ৰষ্টাচাৰি সাংসদজনে উন্নয়নৰ পুঁজি সমষ্টিৰ উন্নয়নৰ বাবে খৰচ নকৰিলে।

আগন্তক লোকসভা নিৰ্বাচনত দুৰ্নীতি-ভ্ৰষ্টাচাৰ আৰু যৌন কেলেংকাৰীত নিমজ্জিত সাংসদজনক পুনৰ বা দলীয় টিকট প্ৰদান নকৰিবলৈ সংগঠনটোৱে বি জে পিক আহ্বান জনায়।

কৃষক শ্ৰমিক উন্নয়ন পৰিষদে দুৰ্নীতি আৰু যৌন কেলেংকাৰীত জড়িত ৰাজেন গোহাঁইক দলীয় টিকট প্ৰদান নকৰিবৰ বাবে দলটোৰ নেতৃত্বলৈ পত্ৰ প্ৰেৰণ কৰিছে। বি জে পিৰ কেন্দ্ৰীয় সভাপতি অমিত শ্বাহ, মুখ্যমন্ত্ৰী সৰ্বানন্দ সোণোৱাল, ৰাজ্যিক সভাপতি ৰঞ্জিত দাস আৰু 'নেডা’ৰ আহ্বায়ক মন্ত্ৰী হিমন্ত বিশ্ব শৰ্মালৈ পত্ৰ দিয়া বুলি জানিবলৈ দিয়ে। দলটোৱে যদি ইয়াৰ পাছতো গোহাঁইক নগাঁও লোকসভা সমষ্টিত টিকট প্ৰদান কৰে, তেন্তে সংগঠনটোৱে বি জে পি আৰু ৰাজেন গোহাঁইৰ বিৰুদ্ধে প্ৰচাৰ চলাব বুলিও হুংকাৰ দিয়ে।

ৰাজেন গোঁহাইক পুনৰ টিকট প্ৰদান নকৰা আৰু বি জে পিৰপৰা সাংসদজনক বহিষ্কাৰ কৰাৰ দাবীৰে বুধবাৰৰপৰা সংগঠনটোৱে নগাঁৱত আন্দোলনৰ কাৰ্যসূচী গ্ৰহণ কৰিব। সেই অনুযায়ী কাইলৈ সমগ্ৰ নগাঁও লোকসভা সমষ্টিত 'বেটি বচাও ৰাজেন গোহাঁইক হতাও’ কাৰ্যসূচী পালন কৰিব। অহা ১০ মাৰ্চত নগাঁও জিলা উপায়ুক্ত কাৰ্যলয়ৰ সন্মুখত ৰাজেন গোহাঁইৰ বিৰুদ্ধে সংগঠনটোৱে তিনি ঘন্টীয়া অৱস্থান ধৰ্মঘট কাৰ্যসূচী পালন কৰিব বুলি জানিবলৈ দিয়ে।