অপূৰ্ব বৰা, তেজপুৰঃ ২০১৬ৰ বিধানসভা নিৰ্বাচনৰ সময়ত বিজেপিয়ে প্ৰকাশ কৰা ভিজন ডকুমেণ্টত টে’ট উত্তীৰ্ণ ঠিকাভিত্তিক শিক্ষকসকলৰ চাকৰি নিয়মীয়াকৰণৰ প্ৰতিশ্ৰুতি লিপিবদ্ধ হৈছিল। বিজেপি শাসনলৈ অহাৰ তিনিটা বছৰ পূৰণ হ’ল, কিন্তু ঠিকাভিত্তিক শিক্ষকসকলৰ চাকৰি নিয়মীয়াকৰণ নহ’ল। কিন্তু ইয়াৰ বিপৰীতে ৰাজ্যৰ শিক্ষা মন্ত্ৰী সিদ্ধাৰ্থ ভট্টাচাৰ্যই টে’ট উত্তীৰ্ণ শিক্ষকসকলক পুনৰ টে’টত বহি তেওঁলোকৰ প্ৰমাণ-পত্ৰ নবীকৰণ কৰিব লাগিব বুলি কৰা মন্তব্যই সৃষ্টি কৰিছে অসন্তুষ্টিৰ।
সেই অনুসৰি মঙলবাৰে ৰাজ্যৰ প্ৰতিখন জিলাৰ লগতে শোনিতপুৰ উপায়ুক্তৰ কাৰ্যালয়ৰ সন্মুখত ধৰ্ণা কাৰ্যসূচী ৰূপায়ণ কৰে শোনিতপুৰ জিলা সমিতিয়ে৷ উপায়ুক্তৰ জৰিয়তে মুখ্যমন্ত্ৰীলৈ স্মাৰক-পত্ৰ প্ৰেৰণ কৰে । আজিৰ কাৰ্যসূচী ৰূপায়ণ কৰা প্ৰতিবাদী কাৰ্যসূচীত সদৌ অসম প্ৰাথমিক টে’ট উত্তীৰ্ণ শিক্ষক সমাজৰ নেতৃত্ববৃন্দৰ লগতে শোনিতপুৰ জিলা সমিতিৰ কেইবাহাজাৰ টে’ট শিক্ষকে অংশগ্ৰহণ কৰে।
সংগঠনটোৱে বৰ্তমানৰ শিক্ষা মন্ত্ৰী সিদ্ধাৰ্থ ভট্টাচাৰ্যই বিদ্যালয়ৰ শৈক্ষিক পৰিৱেশ বিনষ্ট কৰাৰো অভিযোগ আনে।
‘পূৰ্বৰ শিক্ষা মন্ত্ৰীয়ে যি পৰিৱেশৰ সৃষ্টি কৰিছিল সেই পৰিৱেশ এখেতে বিনাশ কৰিছে। বৰ্তমান সময়ত আমি যিদৰে ভাঙি পৰিছোঁ, তাৰ পৰা কেৱল আমাৰেই ক্ষতি হোৱা নাই বৰঞ্চ কণ কণ শিশুসকলৰো ক্ষতি হৈ আছে। যোৱা কিছুদিনৰপৰা টে’ট উত্তীৰ্ণ ঠিকা ভিত্তিক শিক্ষকসকলে আন্তৰিকতাৰে, সুস্থ মগজু লৈ সুস্থ পৰিৱেশত পাঠদান কৰিব পৰা নাই। বাৰে বাৰে ভাবি আছোঁ আমি শেষ হৈ যাম নেকি? শিক্ষা মন্ত্ৰীৰ ক্ষমতা আছে, আজি যদি আমাৰ চাকৰি নাইকিয়া কৰি দিয়ে আমি কৰিম কি?’ সংগঠনটোৰ সাধাৰণ সম্পাদক মিৰাজুল ৰচিদে এনেদৰে কয়।
টেট উত্তীৰ্ণ ঠিকাভিত্তিক শিক্ষকৰ এক বৃহৎসংখ্যকে বয়সৰ ফালৰপৰা অন্য চাকৰিৰ যোগ্যতা হেৰুওৱাৰ কথা উল্লেখ কৰি মিৰাজুল ৰচিদে কয় যে ঠিকাভিত্তিক শিক্ষকসকলৰ চাকৰি নিয়মীয়াকৰণ নকৰিলে ৰাজপথত আন্দোলন কৰাৰ বাদে গত্যন্তৰ নাই।
ইপিনে, যোৱা ১৩ জুনত আকাশবাণী গুৱাহাটী কেন্দ্ৰত এটা পোনপটীয়া ফোন-ইন অনুষ্ঠানত শিক্ষামন্ত্ৰী সিদ্ধাৰ্থ ভট্টাচাৰ্যই টে’ট উত্তীৰ্ণ ঠিকাভিত্তিক শিক্ষকসকলৰ টে’ট উত্তীৰ্ণৰ প্ৰমাণ পত্ৰক ‘ড্ৰাইভিং লাইচেন্স’ৰ সৈতে তুলনা কৰি ইয়াৰ নৱীকৰণৰ কথা কৈছিল। শিক্ষা মন্ত্ৰীৰ এই কথাক গৰিহণা দিয়ে সংগঠনটোৱে। লগতে কোনো কাৰণতে টে’টৰ প্ৰমাণ পত্ৰৰ নবীকৰণ মানি নলয় বুলিও স্পষ্ট কৰি দিয়ে।