কোকৰাঝাৰঃ কোকৰাঝাৰ চহৰৰ মাজ মজিয়াৰ এটা বাসগৃহৰ পৰা দিন দুপৰতে চোৰে দুৱাৰ ভাঙি বৃহৎ পৰিমাণৰ সোণৰ আ-অলংকাৰ লুটি নিয়া কাৰ্যই চাঞ্চল্যৰ সৃষ্টি কৰিছে।
বাসগৃহটোত কোনো নথকাৰ সুযোগ গ্ৰহণ কৰি চোৰে এনেদৰে প্ৰায় দহলাখ টকা মূল্যৰ আ- অলংকাৰ সহ নগদ দহ হেজাৰ টকা লৈ উধাও হোৱাত মূৰে কপালে হাত দিছে বাসগৃহটোৰ গৰাকীয়ে ৷
প্ৰাপ্ত বাতৰি মতে কোকৰাঝাৰ চহৰৰ ৮ নং ৱাৰ্ডৰ বাসিন্দা ছটন কুমাৰ ব্ৰহ্মই আজি নিজৰ পত্নী ফুলশ্ৰী বসুমতাৰীৰ সৈতে গুৱাহাটীত অধ্যয়ন কৰা কন্যা মনিছা বসুমতাৰীক ঘৰলৈ আনিবলৈ গৈছিল।
পুৱা প্ৰায় ৮.৩০ মান বজাত নিজ ঘৰৰ পৰা ওলাই যোৱা দম্পত্তীটোৱে গুৱাহাটীৰ পৰা সন্ধিয়া ৫ মান বজাত উভতি আহি প্ৰথম অৱস্থাত ঘৰৰ আচবাবসমূহ সিচৰিত হৈ থকা প্ৰত্যক্ষ কৰি চিন্তিত হৈ পৰে ৷
পিছত ছটন কুমাৰ ব্ৰহ্ম আৰু তেওঁৰ পত্নী ফুলশ্ৰী বসুমতাৰীয়ে ঘৰৰ পিছফালৰ দৰজা ভঙা দেখি হতভম্ব হৈ পৰে আৰু ঘৰখনত এক হূলস্থলীয় পৰিবেশৰ সৃষ্টি হয়৷ পিছত ঘৰখনত থকা তেওঁলোকৰ সোণৰ আ- অলংকাৰ আৰু দহ হেজাৰ টকা নেদেখি মূৰে-কপালে হাত দিয়ে৷
উল্লেখ্য যে দিন-দুপৰতে কোকৰাঝাৰ চহৰত চোৰে এনেদৰে বাসগৃহত প্ৰৱেশ কৰি লুটপাত চলোৱা কাৰ্যই সকলোকে ভবাই তুলিছে। ইতিমধ্যে ছটন কুমাৰ ব্ৰহ্মই কোকৰাঝাৰ সদৰ থানাত ঘটনা সন্দৰ্ভত এখন এজাহাৰ দাখিল কৰিছে ৷