বাঘবৰঃ ৰাজ্যত দিনে দিনে বৃদ্ধি পাইছে অপহৰণৰ ঘটনা। বৰপেটা জিলাৰ বাঘবৰ থানাৰ অন্তৰ্গত মন্দিয়াৰ পৰা যোৱা বুধবাৰে সন্ধানহীন হয় তিনি গৰাকীকৈ ছাত্ৰী। ঘটনা সন্দৰ্ভত মন্দিয়া আৰক্ষী চকীত ছাত্ৰীকেইগৰাকীৰ পৰিয়ালে গোচৰ ৰুজু কৰে।
সন্ধানহীন ছাত্ৰী কেইগৰাকী হৈছে আগমন্দিয়া গাঁৱৰ অষ্টম শ্ৰেণীৰ আয়েশা ছিদ্দিকা, নৱম শ্ৰেণীৰ ৰৌমাৰী গাৱৰ জাহিদা খাতুন আৰু পঞ্চম শ্ৰেণীৰ ছাত্ৰী উম্মে ছিদ্দিকা। ইয়াৰে আয়েশা আৰু জাহিদা মন্দিয়া আৰ্দশ বিদ্যালয়ত অধ্যয়নৰত। আনহাতে উম্মে ১৭৩৭নং আগমন্দিয়া নিম্ন বুনিয়াদি বিদ্যালয়ত পঞ্চম শ্ৰেণীৰ ছাত্ৰী।
জানিব পৰা মতে, বুধবাৰে মন্দিয়াৰ পৰা ছাত্ৰীকেইগৰাকীয়ে আলহী ঘৰলৈ গৈ আছিল। সেই সময়তে চাৰিজনীয়া অপহৰণকাৰী দল এটাই নিচাযুক্ত দ্ৰব্য খুৱাই ছাত্ৰীকেইগৰাকীক বৰপেটা ৰোডলৈ লৈ যায়। তাৰ পৰা ৰেলেৰে তিনিচুকীয়ালৈ নিয়ে বুলি উদ্ধাৰকৃত ছাত্ৰীকেইগৰাকীয়ে জানিবলৈ দিছে।
তিনিচুকীয়াৰ পৰা ছাত্ৰীকেইগৰাকীয়ে কোনোমতে অপহৰণকাৰীৰ কবলৰ পৰা মুক্ত হৈ নিজগৃহলৈ ফোন কৰে। লগে লগে পৰিয়ালৰ লোকসকলে সমগ্ৰ ঘটনা সম্পৰ্কে আৰক্ষীক জনায়।
আৰক্ষীয়ে তৎপৰতাৰে পৰিয়ালৰ লোকৰ সৈতে তিনিচুকীয়ালৈ গৈ ছাত্ৰী তিনিগৰাকীক উদ্ধাৰ কৰিবলৈ সমৰ্থ হয়। আজি মন্দিয়াত নিজ নিজ গৃহত উপস্থিত হৈছে ছাত্ৰীকেইগৰাকী। ঘটনা সন্দৰ্ভত বাঘবৰ আৰক্ষীয়ে অপহৰণকাৰীক বিচাৰি তদন্ত অব্যাহত ৰাখিছে।