নাগালেণ্ডঃ নাগালেণ্ডৰ মুখ্যমন্ত্ৰী টি আৰ জেলিয়াঙে ধৰ্মক লৈ কৰা মন্তব্য এতিয়া চৰ্চাৰ বিষয় হৈ পৰিছে৷ আমাৰ ওপৰত ধৰ্ম জাপি নিদিলেহে মিত্ৰতা কিম বুলি কৈছিল নাগালেণ্ডৰ মুখ্যমন্ত্ৰী টি আৰ জেলিয়াঙে৷ বুধবাৰে মুখ্যমন্ত্ৰী টি আৰ জেলিয়াঙে নাগালেণ্ডত তেওঁৰ দল নগা পিপুলচ ফ্ৰণ্ট (এনপিএফ)ৰ শাসনেই বৰ্তি থাকিব বুলি কয়৷ এনপিএফ আৰু বিজেপিৰ মিত্ৰতাৰ প্ৰসংগতো মন্তব্য প্ৰকাশ কৰি বিজেপিৰ বাবে দুৱাৰ মুকলি হৈ আছে বুলি কয়৷
উল্লেখ্য যে, নাগালেণ্ডৰ এনপিএফ দলৰ সৈতে বিজেপিয়ে যোৱা এটা দশকৰ পৰাই সহযোগী দল হিচাপে আছে৷ কিন্তু গত বছৰত বিজেপি দলে এনপিএফ-ৰ লগত মিত্ৰতা ভংগ কৰি ৰাষ্ট্ৰবাদী ডেমক্ৰেটিক প্ৰগ্ৰেছিভ পাৰ্টী এনডিপিপিৰ সৈতে সহযোগিতা কৰাৰ কথা ঘোষণা কৰে৷ জানিব পৰা মতে, নিউজ১৮ৰ লগত হোৱা সাক্ষাৎকাৰত বিজেপি দলৰ মহাসচিব ৰাম মাধৱে এই কথা ব্যক্ত কৰিছে৷ মাধৱে কয়, বিজেপি দলে আসনৰ প্ৰসংগত মতভেদ হোৱাৰ বাবেই এনপিএফৰ সৈতে মিত্ৰতা কৰাৰ পৰা বিৰত থাকে৷
