কোকৰাঝাৰঃ অসমৰ জনজাতিসকলক শীঘ্ৰে জনজাতিকৰণ কৰা , অাদিৱাসী বিদ্ৰোহী সংগঠনসমুহৰ দাবীসমুহ ৰাজনৈতিক অালোচনাৰ জৰিয়তে সমাধান কৰা , উচ্ছেদিত অাদিৱাসী লোকসকলকক ভূমি আৱণ্টন প্ৰদান কৰি পুণৰসংস্থাপন কৰা  আৰু আদিৱাসী চাহ শ্ৰমিকক ভূমি পট্টা প্ৰদান কৰাৰ দাবীত অাজি আদিৱাসী জাতীয় অভিবৰ্তনৰ চমুকৈ এএনচিৰ উদ্যোগত কোকৰাঝাৰত ৰেলপথ অৱৰোধ কাৰ্যসূচী পালন কৰা হয় । ৰাতিপুৱা ৬ বজাৰ পৰা দুপৰীয়া ১২:৩০  বজালৈ ৰেলপথ অৱৰোধৰ ফলত কেবাখনো ৰে'লৰ যাত্ৰা বাতিল হোৱাৰ লগতে বিভিন্ন ষ্টেচনে ষ্টেচনে ৰেলসমুহ ৰখাই থোৱাত ৰেলযাত্ৰীসকলৰ বিলাই-বিপত্তিৰ সীমা নোহোৱা আৰু উত্তৰ-পুৱ  সীমান্ত ৰেলৱেত এক হাহাকাৰময় অৱস্থাৰ সৃষ্টি হয়।

যুদ্ধবিৰতৰ সদস্যসকল মাওবাদীৰ প্ৰতি আকৃষ্ট হ'লে আৰু চীনে তাৰ সুযোগ ললে জুই জ্বলিব অসমত : দূৰ্গা হাসদা

উল্লেখ্য যে আজি এএনচিৰ উদ্যোগত কোকৰাঝাৰত অনুষ্ঠিত হোৱা ৰেলপথ অৱৰোধ কাৰ্যসূচীত ৰাতিপুৱাৰে পৰা কোকৰাঝাৰ ৰেলৱে ষ্টেচনলৈ বুলি আদিৱাসী জনতাৰ লানি নিছিগা সোঁত বয় । আৱাল বৃদ্ধ বণিতাৰ পৰা আৰম্ভ কৰি কোলাত কণ কণ শিশুক লৈ জীয়ৰী-বোৱাৰীয়ে সমন্বিতে যুৱক-যুৱতী সকলে কোকৰাঝাৰ ৰেলৱে ষ্টেচনত ভিৰ কৰাত ষ্টেচনত বিৰ দি বাট নোপোৱা অৱস্থাৰ সৃষ্টি হয় । প্ৰায় দহ সহস্ৰাধিক অাদিৱাসী জনতাই কোকৰাঝাৰ ৰেলৱে ষ্টেচনৰ ৰেলপথত বহি পৰাত ৰে'ল চলাচল সম্পূৰ্ণ ৰূপে ব্যাহত হৈ পৰে ।

এএনচি জিন্দাবাদ , জনজাতিকৰণ লাগিবই ,আমাৰ দাবী নাৰ্য দাবী আদি ইত্যাদি শ্লোগানেৰে পিকেটিংকাৰী সকলে কোকৰাঝাৰ ৰে'লৱে ষ্টেচনৰ চৌহদ উত্তাল কৰি তোলে । এনে এক উত্তপ্ত পৰিস্থিতিৰ মাজত এএনচিৰ সংগ্ৰামী গোটৰ সভাপতি বয়েল হেমব্ৰম আৰু সাধাৰণ সম্পাদক বীৰসিং মুণ্ডাই আদিৱাসীৰ সমস্যাক লৈ চৰকাৰৰ অমনোযোগিতা আৰু খামখেয়ালীক কঠোৰ ভাষাৰে নিন্দা কৰি অতি শীঘ্ৰে সমস্যা সমাধানৰ দাবী উত্থাপন কৰিছে ।  সংবাদ মাধ্যমৰ আগত বীৰসিং মু্ণ্ডাই কয় যে ৰে'লপথ অৱৰোধৰ পিছতো যদিহে চৰকাৰৰ পৰা কোনো যোগাত্মক সঁহাৰি নাপায় তেনেহ'লে অহা ২২ মাৰ্চৰ পৰা ১০০ ঘণ্টীয়া ৰাষ্ট্ৰীয় ঘাইপথ অৱৰোধ কাৰ্যসূচী গ্ৰহণ কৰা হ'ব ।

সাংবিধানিক অধিকাৰ পুৰণ নোহোৱালৈকে ঐক্যবদ্ধ সংগ্ৰাম অব্যাহত থাকিব বুলি স্পষ্ট কৰি দি বীৰসিং মুণ্ডাই বিজেপি চৰকাৰে বৈষম্যমুলক নীতি গ্ৰহণ কৰা বুলি অভিযোগ কৰিছে। ডিএইচডি বা বিএলটি ৰ দৰে সংগঠনসমুহৰ সমস্যা কম সময়ৰ ভিতৰতে চৰকাৰে সমাধান কৰিছে , আলফা, এনডিএফবিৰ ক্ষেত্ৰত মধ্যস্থতাকাৰী নিয়োগ কৰিছে অথচ  ২০০১ চনৰ পৰাই যুদ্ধবিৰতিত থকা আদিৱাসী বিদ্ৰোহী সংগঠনসমুহৰ সমস্যা সমাধানত চৰকাৰে বৈষম্যতাৰ সৃষ্টি কৰিছে বুলি অভিযোগেৰে বীৰসিং মুণ্ডাই প্ৰতিশ্ৰুতি দিও জনজাতিকৰণৰ ক্ষেত্ৰতো বৈষম্যতামুলক নীতি অৱলম্বন কৰাৰ অভিযোগ উত্থাপন কৰিছে।

চৰকাৰে গণতান্ত্ৰিক আন্দোলনক গুৰুত্ব নিদিলে ৰাইজে দেখুৱাই দিয়া পথেৰে নেৰ্তৃবৃন্দই পৰবৰ্তী সংগ্ৰাম অব্যাহত ৰাখিব আৰু ইয়াৰ বাবে অঘটন সংঘটিত হ'লে চৰকাৰে জগৰীয়া হব বুলি তাপপৰ্যপূৰ্ণ মন্তব্য আগবঢ়াইছে বীৰসিং মুণ্ডাই । ইপিনে যুদ্ধবিৰত বীৰছা কামাণ্ডো ফৰ্চৰ অধ্যক্ষ দৃৰ্গা হাসদাই চৰকাৰৰ বৈষম্যমুলক নীতিক তীব্ৰ ভাষাৰে গৰিহণা দি যুদ্ধবিৰত অাদিৱাসী সংগঠনসমুহৰ বাবেই মাওবাদীয়ে অসমত জাল বিস্তাৰ কৰিবলৈ সক্ষম হোৱা নাই বুলি তাৎপৰ্যপূৰ্ণ মন্তব্য কৰিছে ।

অৱশ্যে বছৰৰ পিছত বছৰ ধৰি বঞ্চনাৰ বলি হৈ যদিহে যুদ্ধবিৰতত থকা কেডাৰখিনিয়ে মাওবাদীৰ প্ৰতি আকৃষ্ট হৈ মাওবাদীত যোগদান কৰে আৰু চীনে তাৰ সুযোগ লয় তেনেহলে অসমত জুই জ্বলিব বুলি বীৰছা কামাণ্ডো ফৰ্চৰ অধ্যক্ষ দূৰ্গা হাসদাই আশাংকা প্ৰকাশ কৰিছে । কেডাৰখিনিক ধৰি ৰখাৰ স্বাৰ্থত তথা জাতীয় সমস্যাসমুহ সমাধান কৰাৰ দাবীত অতি শীঘ্ৰে ফলপ্ৰসু আলোচনাৰ দাবী উত্থাপন কৰিছে দূৰ্গা হাসদাই ।

অাজিৰ ৰে'লপথ অৱৰোধথলীত চাওতাল ছাত্ৰ সন্থাৰ সভাপতি চাইমন কিস্কু , আছাৰ ৰাজু তিৰ্কী, অাকমা , কোব্ৰা , বীৰছা, চাওতাল টাইগাৰ ফৰ্চ , কুৰুক সাহিত্য সভা , চাওতাল সাহিত্য সভা আদিকে ধৰি আদিৱাসী জনগোষ্ঠীৰ প্ৰায় প্ৰতিটো সংগঠনৰ নেতা-কৰ্মী উপস্থিত আছিল । আজিৰ ৰেলপথ অৱৰোধৰ ফলত ৮খনকৈ ৰে'লৰ চলাচল বাতিল কৰিবলৈ বাধ্য হয় ৰে'লৱে কৰ্তৃপক্ষই ।

আজিৰ ৰে'লপথ অৱৰোধ কাৰ্যসূচী পুৱা ৬ বজাৰ পৰা বিয়লি ৬ বজালৈ অনুষ্ঠিত হোৱাৰ কথা আছিল যদিও অৱৰোধথলীত কোকৰাঝাৰ জিলা উপায়ুক্ত বিবেকানন্দ চৌধুৰী আৰু আৰক্ষী অধীক্ষক ৰাজেন সিং উপস্থিত হৈ সংগঠনৰ নেৰ্তৃবৰ্গক চৰকাৰৰ সতে শীঘ্ৰেই আলোচনাত বহাই দিয়াৰ ব্যৱস্থা কৰা হব বুলি প্ৰতিশ্ৰুতি দিয়াত ৰেলপথ অৱৰোধ কাৰ্যসূচী হ্ৰাস কৰি দুপৰীয়া ১২:৩০ বজাত অৱৰোধ কাৰ্যসূচী প্ৰত্যাহাৰ কৰাৰ পিছত ৰে'লসমুহৰ চলাচল পুনৰাই আৰম্ভ হয় ।