পুনৰ মহিলা প্ৰাৰ্থীৰ বিৰুদ্ধে জয়ী হৈ হোৱাইট হাউছলৈ প্ৰত্যাৱৰ্তন ড’নাল্ড ট্ৰাম্পৰ

নিউয়ৰ্কঃ আমেৰিকাৰ ৰাষ্ট্ৰপতি নিৰ্বাচনত ‘ৰঙা ধুমুহা’ত বিধ্বস্ত হৈ পৰিছে ডেম’ক্ৰেটৰ কমলা হেৰিছ। ৰাজনৈতিক প্ৰত্যাৱৰ্তনেৰে আমেৰিকাৰ ৰাষ্ট্ৰপতি নিৰ্বাচনৰ ইতিহাসত এক অনন্য নজিৰ গঢ়িবলৈ সক্ষম হ’ল ড’নাল্ড ট্ৰাম্প। বিশ্বৰ মহাশক্তিশালী দেশখনৰ মহাশক্তিশালী নেতা হিচাপে পুনৰ এবাৰ নিৰ্বাচিত হ’ল ৰিপাব্লিকান পাৰ্টিৰ নেতাগৰাকী। 

২০১৬ৰ ৰাষ্ট্ৰপতি নিৰ্বাচনত জয়ী হৈ হোৱাইট হাউচত প্ৰৱেশৰ অনুমতি লাভ কৰা ৰঙা দল হিচাপে খ্যাত ৰিপাব্লিকান পাৰ্টীৰ ট্ৰাম্পে ২০২০ৰ নিৰ্বাচনত ডেম’ক্ৰেট জো বাইডেনৰ হাতত পৰাস্ত হ’বলগীয়া হৈছিল। কিন্তু এইবাৰ প্ৰত্যাৱৰ্তন ঘটাই পুনৰ এবাৰ ৰাষ্ট্ৰপতি নিৰ্বাচিত হৈছে ট্ৰাম্প। ডেম’ক্ৰেটিক পাৰ্টিৰ প্ৰতিদ্বন্দ্বী কমলা হেৰিছক পৰাস্ত কৰি হোৱাইট হাউচত প্ৰৱেশ কৰিছে ড’নাল্ড ট্ৰাম্পে।