তিনিচুকীয়াঃ কৰ’নাতংকৰ মাজতে তিনিচুকীয়াত এক মৰ্মান্তিক ঘটনা পোহৰলৈ আহিছে৷ কৰ’নাৰ ভয়াৱহতাৰ পৰিপ্ৰেক্ষিতত সমগ্ৰ দেশৰ লগতে ৰাজ্যত অব্যাহত থকা লকডাউনৰ সময়তে জিলাখনৰ সদৰ চহৰৰ সমীপতে কৰুণ মৃত্যুক সাবটি ল’লে দুটিকৈ শিশুৱে৷ জানিব পৰা মতে শুকুৰবাৰৰ পৰা নিৰুদ্দেশ হৈ আছিল শিশু দুটি৷

আবেলিৰ পৰত দুই শিশু ক্ৰমে সমীৰ উজীৰ(১২) আৰু সঞ্জয় উজীৰ(৮)য়ে চিপছ আনিবলৈ বুলি পথৰুৱা ৰাস্তাৰে ঘৰৰ পৰা কিছু দূৰৈত থকা এখন গেলামালৰ দোকানলৈ গৈছিল৷ বহু সময়লৈকে ঘৰলৈ ঘূৰি নহাত পিতৃ-মাতৃ ক্ৰমে কুলেশ উজীৰ আৰু বেউটি উজীৰে বিছাৰিবলৈ আৰম্ভ কৰে। সন্ধিয়া পৰলৈকে বিচাৰি নোপোৱাত অঞ্চলটোৰ ৰাইজৰ মাজতো হুৱাদুৱা লাগে৷

শনিবাৰেও কোনো সন্ধান নোলোৱাত উপায়হীন হৈ পৰে শিশু দুটিৰ পিতৃ-মাতৃ৷ এনে পৰিস্থিতিত দুই পুত্ৰৰ নিৰুদ্দেশ সন্দৰ্ভত তিনিচুকীয়া সদৰ থানাত এজাহাৰ দাখিল কৰে পিতৃয়ে৷ ইয়াৰ পাছতো শনিবাৰলৈকে কোনো সম্ভেদ নোলাল দুই ভাতৃৰ৷

অৱশেষত সন্ধানহীন হোৱা দুদিনৰ পিছত আজি তিনিচুকীয়া চহৰৰ সমীপৰ বৰগুৰি হেঙালুগুৰি পথাৰৰ মাজৰ এটা পুখুৰীত পানীত উপঙি থকা অৱস্থাত উদ্ধাৰ হয় দুই ভাতৃৰ মৃতদেহ। এই ঘটনাৰ পাছতে এতিয়া সমগ্ৰ অঞ্চলটোত শোকাকুল পৰিৱেশে বিৰাজ কৰিছে৷