13 Apr

গণ ধৰ্ষণ কাণ্ডৰ অভিযুক্ত বিজেপি বিধায়ক কুলদ্বীপক সোধ-পোছৰ বাবে আটক CBIৰ

By NNO WEB BUREAU 0 Comments

ডিজিটেল ডেস্কঃ গণ ধৰ্ষণ কাণ্ডত জৰিত থকাৰ অভিযোগ উত্থাপিত হোৱা বিজেপিৰ বিধায়ক কুলদ্বীপ সিং চেগাৰক শুকুৰবাৰে পুৱতি নিশা ৪.৩০ বজাত সোধপোছৰ বাবে আটক কৰে CBI-এ৷ উত্তৰ প্ৰদেশ আৰক্ষীয়ে চেগাৰক সুৰক্ষা দিয়া বুলি অভিযোগ উত্থাপন হৈ থকাৰ সময়তে চিবিআইয়ে চেগাৰৰ নিজ বাসভৱনত পুৱতি নিশা আটক কৰে৷ 

চেগাৰৰ বিৰুদ্ধে ধৰ্ষণ আৰু ধৰ্ষিতাৰ পিতৃক হত্যাৰ গোচৰ ৰুজু হৈছিল৷ যোৱা এবছৰ ধৰি তদন্ত নোহোৱাকৈ থকা অভিযোগ সন্দৰ্ভত অৱশেষত উত্তৰ প্ৰদেশ চৰকাৰে চিবিআইক গোচৰ দিবলৈ বাধ্য হৈছিল৷ শুকুৰবাৰে পুৱাই লক্ষ্নৌৰ ইন্দিৰানগৰৰ বাসভৱনত আটক কৰাৰ পূৰ্বেই কেইবাঘণ্টা ধৰি সোধ-পোছ কৰে বিজেপিৰ বিধায়ক চেগাৰক৷ 

বিধায়কৰ ভাতৃ অতুল সিঙৰ বিৰুদ্ধেও ধৰ্ষণৰ অভিযোগকাৰীৰ পিতৃক মাৰধৰ কৰাৰ গোচৰ ৰুজু হয়৷ চিবিআইয়ে বিধায়কৰ পৰিয়ালৰ লোককো এই ঘটনা সন্দৰ্ভত সোধ-পোছ কৰে৷  

বৃহস্পতিবাৰে নিশা চেগাৰৰ বিৰুদ্ধে আৰু তিনি খন এজাহাৰ দাখিল কৰাৰ লগতে গোচৰ ৰুজু কৰা হয়৷ আনহাতে ঙৰৰ পৰাৱ নি চেগাৰক লক্ষ্নৌৰ চিবিআইৰ কাৰ্যালয়ত কেইবাঘণ্টা জেৰা কৰে চিবিআইয়ে৷ এলাহাবাদ উচ্চ ন্যায়ালয়ে শুকুৰবাৰ বিধায়কৰ গোচৰৰ শুনানি কৰিব৷

ৰাষ্ট্ৰীয় সংবাদমাধ্যমৰ মতে, চিবিআইয়ে কুলদ্বীপ সিং চেগাৰৰৰ ফোনকল দাতা লাভ কৰে৷ চেগাৰে আৰক্ষীৰ সৈতে প্ৰতিটো মুহূৰ্তত সম্পৰ্ক বজাই ৰাখিছিল৷ মাখি থানাৰ এগৰাকী আৰক্ষী বিষয়াক চিবিআইয়ে সোধ-পোছৰ বাবে আটক কৰিব পাৰে৷ আন কেইবাগৰাকী লোকক এই ঘটনা সন্দৰ্ভত আটক কৰিব পাৰে চিবিআইয়ে৷

ধৰ্ষণৰ অভিযোগ উত্থাপন কৰা কিশোৰীৰ খুৰাই কয় যে সকলো অভিযুক্তক আটক কৰিব লাগে৷ বিধায়ক কুলদ্বীপ চেগাৰৰ এবছৰৰ কল ৰেকৰ্ড উলিয়ালে সকলো ওলাই পৰিব৷ তেতিয়া গম পোৱা যাব তেঁও এই ঘটনাৰ সৈতে কিমান তললৈ জৰিত আছে৷ মই যোগী আদিত্য নাথক অনুৰোধ জনাম তেওঁ আমাৰ পৰিয়ালক সুৰক্ষা দিয়ক৷

 
আনহাতে ধৰ্ষণৰ অভিযোগ উত্থাপন কৰা কিশোৰীয়ে কয় যে বিধায়কৰ বিৰুদ্ধে উচিত তদন্ত আৰু শাস্তি দাবী কৰো৷ বিধায়ক কুলদ্বীপ আৰু ভাতৃ অতুলক গ্ৰেপ্তাৰৰ দাবী জনাও৷ শুকুৰবাৰে চিবিআইয়ে বিধায়কক গ্ৰেপ্তাৰ কৰাৰ সম্ভৱনা আছে৷ 

উত্তৰ প্ৰদেশ চৰকাৰে উন্নাও ধৰ্ষণ কাণ্ডৰ তদন্তৰ দায়িত্ব চিবিআইক প্ৰদান কৰিছিল বৃহস্পতিবাৰে৷ প্ৰায় এবছৰৰ মূৰকত ধৰ্ষণ কাণ্ডৰ বিৰুদ্ধে গোচৰ ৰুজু কৰে যোগী আদিত্য নাথৰ চৰকাৰে৷ বৃহস্পতিবাৰে পুৱাই উত্তৰ প্ৰদেশ আৰক্ষীয়ে বিজেপিৰ বিধায়ক কুলদ্বীপ সিং চেগাৰৰ বিৰুদ্ধে ভাৰতীয় দণ্ড বিধিৰ ৩৬৩, ৩৬৬, ৩৭৬, ৫০৬ আৰু POCSO ধাৰাত গোচৰ ৰুজু কৰে৷ 

সমগ্ৰ দেশত এই ঘটনাকলৈ প্ৰতিক্ৰিয়াৰ সৃষ্টি হোৱাতহে এই অভিযোগক গুৰুত্বসহকাৰে লয় চৰকাৰে৷ তাৰ মাজতে উত্তৰ প্ৰদেশৰ বিজেপি বিধায়ক সুৰেন্দ্ৰ সিঙে নিজ দলৰ বিধায়ক কুলদ্বীপ সিং চেগাৰক সমৰ্থন কৰিবলৈ গৈ অদ্ভুত যুক্তি দিয়ে৷ উন্নাও ধৰ্ষণ কাণ্ডৰ অভিযোগ উত্থাপন কৰা কিশোৰীক বালিক বুলি কৈ তিনিটা সন্তানৰ মাতৃ আখ্যা দিয়ে বিধায়ক সুৰেন্দ্ৰ সিঙে৷ তিনি সন্তানৰ মাতৃক ধৰ্ষণ কৰিব নোৱাৰে বুলিও কয়৷

আনহাতে ধৰ্ষণৰ অভিযোগ উত্থাপন কৰা কিশোৰীৰ পিতৃৰ মৃত্যুৰ পিছত চিকিৎসকে গাফিলতি কৰাৰ গুৰুতৰ অভিযোগ উত্থাপন হৈছে৷ ধৰ্ষণৰ অভিযোগকাৰী মহিলাৰ পিতৃক অভিযুক্ত বিধায়কৰ লোকে মাৰধৰ কৰাৰ অন্তত চিকিৎসালয়ত ভৰ্তি কৰিছিল যদিও চিকিৎসকে চিকিৎসা কৰাৰ পৰিৱৰ্তে হাঁহি-ধেমালি, ঠাট্টা মষ্কৰা কৰি ইতিকিং কৰিছিল বুলি অভিযোগ উত্থাপন হৈছে চিকিৎসক-আৰক্ষীৰ বিৰুদ্ধে৷ ইতিমধ্যে চিকিৎসকে হাঁহি-ধেমালি কৰি ইতিকিং কৰা ভিডিঅ’ ভাইৰেল হৈছে৷ ডিকে দ্বিবেদী আৰু প্ৰশান্ত উপাধ্যায় নামৰ দুই চিকিৎসকক উত্তৰ প্ৰদেশ চৰকাৰে চাকৰিৰ পৰা নিলম্বন কৰে৷

আনহাতে ধৰ্ষণৰ অভিযোগ উত্থাপন কৰা কিশোৰীৰ পিতৃৰ পিছত তেওঁৰ খুৰাকৰ জীৱনৰ প্ৰতি ভাবুকি অহা বুলি কয়৷ যিকোনো মুহূৰ্তত তেওঁৰ খুৰাকক আক্ৰমণ কৰিব পাৰে বুলি কয়৷ কিশোৰীৰ পৰিয়ালক নিৰাপত্তা দিয়াৰো নিৰ্দেশ দিয়ে চৰকাৰে৷

বিগত বছৰৰ জুন মাহত ১৬ বছৰীয়া কিশোৰীয়ে ধৰ্ষণ কৰাৰ অভিযোগ উত্থাপন কৰিছিল৷ আৰক্ষী থানাত এজাহাৰ দাখিল কৰিছিল যদিও আৰক্ষীয়ে কোনো ধৰণৰ ব্যৱস্থা গ্ৰহণ কৰা নাছিল৷

উত্তৰ প্ৰদেশ আৰক্ষীয়ে বুধবাৰে এখন সংবাদ মেল অনুষ্ঠিত কৰি এই গোচৰৰ তদন্তৰ থকা অৱগত কৰে৷ আৰক্ষীৰ ভূমিকা সন্দৰ্ভত স্পষ্ট কৰি দোষীক ৰেহাই দিয়াৰ বাবে তেওঁলোকে চেষ্টা কৰা নাই বুলি কয়৷ 

আনহাতে বৰ্তমান বিধায়ক কুলদ্বীপ সিঙৰ গ্ৰেপ্তাৰ নহয় বুলি কয়৷ যেতিয়ালৈকে আদালতে বিধায়কক দোষী বুলি নকয় তেতিয়ালৈকে গ্ৰেপ্তাৰ নহয় বুলি কয়৷ আৰক্ষীয়ে বিধায়ক তেওলোকৰ নজৰত অভিযুক্ত বুলিহে কৈছিল৷

উল্লেখ্য যে, উত্তৰ প্ৰদেশৰ উন্নাৱৰ এগৰাকী কিশোৰীয়ে বিজেপি বিধায়ক কুলদ্বীপ সিঙৰ বিৰুদ্ধে সহযোগীৰ সৈতে লগলাগি গণ ধৰ্ষণ কৰাৰ অভিযোগ উত্থাপন কৰে৷ তাৰ পিছতে যোৱা ০৭ এপ্ৰিলত কিশোৰী আৰু কিশোৰীৰ পৰিয়ালে উত্তৰ প্ৰদেশৰ মুখ্যমন্ত্ৰী যোগী আদিত্য নাথৰ লক্ষ্নৌৰ আৱাসৰ সন্মুখত আত্মহত্যা কৰাৰ চেষ্টা চলাই৷ 

আত্মহত্যা চেষ্টা চলোৱাত আৰক্ষীয়ে তেওঁলোকক আটক কৰি থানাত ৰাখিছিল যদিও নিশা মৃত্যু হৈছিল গণ ধৰ্ষণৰ অভিযোগ উত্থাপন কৰা মহিলাৰ পিতৃৰ৷ গণ ধৰ্ষণৰ বলি হোৱা কিশোৰীৰ পিতৃক অভিযুক্তই বেয়াকৈ মাৰধৰ কৰাৰ লগতে আৰক্ষীয়ে বন্দী কৰি ৰাখিছিল৷ ৫ দিন পিছত মহিলাৰ পিতৃৰ মৃত্যু হয়৷