বিজেপিৰ ‘ৱাশ্বিং মেছিনে’ সঁচাকৈয়ে নিকা কৰে নেকি নেতাৰ দুৰ্নীতি-কেলেংকাৰিৰ দাগ?

সঁচাই বিজেপিৰ ৱাশ্বিং মেছিনে নিকা কৰে নেকি নেতাৰ দাগ? একালত বিজেপিয়েই সমালোচনা কৰা সমগ্ৰ দেশৰ এক ডজনৰো অধিক নেতাই আজি গেৰুৱা সাজত বুটলিছে ক্ষমতা, আঁতৰাইছে দাগ। এই লৈ এতিয়া গৰম হৈ পৰিছে ৰাজনীতি।

লাহে লাহে চমু চাপিছে লোকসভা নিৰ্বাচনলৈ। কাৰোবাৰ যদি ক্ষমতা অক্ষুণ্ণ ৰখাৰ প্ৰয়াস, কাৰোবাৰ আকৌ বনবাসৰ পৰা উভতনি যাত্ৰা। প্ৰতিটো নিৰ্বাচনৰ এই একেই কাহিনী, একেই আখ্যান। প্ৰতিবাৰেই প্ৰায় একেবোৰ নেতাই ৰণাঙ্গনত যুঁজ দিয়ে ক্ষমতা লাভ বা অক্ষুণ্ণ ৰখাৰ বাবে। কিন্তু আমোদজনক কথাটো হ’ল- প্ৰতিবাৰেই নিৰ্বাচনৰ ঠিক আগে আগে ৰং সলোৱা নেতা-পালিনেতাৰ উজান উঠে। কিছুমানে ঘনাই ৰং সলায়, আন কিছুমানে আকৌ অলপ ধীৰে সুস্থিৰে।