স্থানীয় সাংবাদ @ নগাঁও জিলাৰ জুৰীয়া খৰঙী গাঁওৰ বিশিষ্ট ধৰ্মপ্রাণ মহিলা , সমাজকৰ্মী জয়মতী বৰাই(৮০) আজি পুৱা ৭:১৫ বজাত ইহলীলা সম্বৰণ কৰে। বিভিন্ন অনুষ্ঠান প্ৰতিষ্ঠানৰ লগত জড়িত মহিলা গৰাকী খৰঙী গাঁও মহিলা সমিতি, খৰঙী গাঁও নামঘৰ আদিৰ লগত জড়িত থকাৰ লগতে সমগ্ৰ জুৰীয়া অঞ্চলৰে এগৰাকী আগশাৰীৰ নামতি আছিল।
প্ৰয়াত প্ৰধান শিক্ষক আদিৰাম বৰাৰ পত্নী জয়মতী বৰাই সমাজখনক আগুৱাই নিয়াত বিভিন্ন প্ৰকাৰে অৰিহনা যোগাই আহিছিল। ১৯৩৮ চনৰ ১৫ আগষ্টত জন্মগ্ৰহণ কৰা মহিলা গৰাকী বিগত কেইমাহ মান ধৰি এক জটিল ৰোগত আক্ৰান্ত হৈ চিকিৎসাধীন হৈ আছিল। উল্লেখযোগ্য যে নিৰ্মিয়মাণ খৰঙী গাওঁ নামঘৰ ভাগ নিৰ্মান কৰাত তেখেতে বিনা দ্বিধাই ভূমি দান কৰি ভক্তপ্ৰাণ ৰাইজৰ পৰা সমাদৰ লাভ কৰিছিল।
তেখেতৰ মৃত্যুত জুৰীয়া প্ৰেছ ক্লাব , ভা:জ:পা ৰ জুৰীয়া মন্ডল সমিতি , খৰঙীগাওঁ নামঘৰ পৰিচালনা সমিতি, শংকৰদেৱ কলা কৃষ্টি বিকাশ কেন্দ্ৰ , অ:গ:প:ৰ তেলিয়া বেবেজীয়া আঞ্চলিক সমিতি , শ্রী শ্রী শংকৰদেৱ মন্দিৰ পৰিচালনা সমিতি , খৰঙীগাওঁ আইমাতৃ সমাজকে আদি কৰি বিভিন্ন দল সংগঠনে শোক প্ৰকাশ কৰিছে। মৃত্যুৰ সময়ত মহিলা গৰাকীয়ে পুত্ৰ তথা দৈনিক অগ্ৰদূতৰ স্থানীয় সংবাদ দাতা দিবাকৰ বৰা, বোৱাৰী ,এগৰাকী জীয়ৰী , জোঁৱাই লগতে তিনি নাতি নাতিনী আৰু বহু আত্মীয়-স্বজনক এৰি থৈ যায়।