newsnextone.com | নগাঁওঃ নাৰী নিৰ্যাতন, ধৰ্ষণ আদি কাণ্ডই সততে জোকাৰি যোৱা বৃহত্তৰ বটদ্ৰৱা অঞ্চলৰ সংখ্যালঘূ অধ্যুষিত এলেকাত ৰবিবাৰে ধৰ্ষণৰ পৰা বাচিবলৈ এগৰাকী মহিলাই দেখুওৱা অনন্য সাহসে সমগ্ৰ ৰাজ্যবাসীৰ লগতে আৰক্ষী প্ৰশাসনৰো প্ৰশংসা বুটলিবলৈ সক্ষম হৈছে ৷ বটদ্ৰৱা আৰক্ষী নিৱেশৰ অন্তৰ্গত ধুনীয়াভেটী চৌৰাপাৰ গাঁৱত ৰবিবাৰে সংঘটিত হয় এক নাৰী নিৰ্যাতনৰ ঘটনা ৷ 

ঘৰত কোনো নথকাৰ সুযোগ গ্ৰহণ কৰি কাচেম আলী নামৰ নৰাধমটোৱে গাঁৱৰে এগৰাকী অকলশৰীয়া মহিলাৰ কোঠাত প্ৰৱেশ কৰে ৷ ভয় ভাবুকি দেখুৱাই মুখত হেচা মাৰি ধৰি বলপূৰ্বকভাৱে অসহায় মহিলাগৰাকীক ধৰ্ষণ কৰিবলৈ চেষ্টা চলায় কাচেমে ৷ বহু চেষ্টা কৰিও নিজকে কাচেমৰ কবলৰ পৰা মুক্ত কৰিবলৈ বিফল হৈ উপস্থিত বুদ্ধি আৰু অদম্য সাহসিকতাৰ পৰিচয় ডাঙি ধৰি নিঃসহায় মহিলাগৰাকীয়ে গ্ৰহণ কৰে এক কঠোৰ পদক্ষেপ ৷ 

কিবা প্ৰকাৰে ঘৰৰ মজিয়াতে পৰি থকা এখন দা হাতত লৈ মহিলাগৰাকীয়ে কৌশলেৰে কাচেম আলীৰ গুপ্তাংগত ঘাপ দিয়ে ৷ লগে লগে ছেদ হয় কলংকিত কাচেমৰ গুপ্তাংগ ৷ ইয়াৰ পিছতেই কাচেমৰ হাতোৰাৰ পৰা মুক্ত হৈ সাহসী মহিলাগৰাকীয়ে চিঞৰ বাখৰ কৰাত ওচৰৰ বহু লোক ঘটনাস্থলীত উপস্থিত হয় আৰু তেজেৰে লুতুৰী পুতুৰী কাচেমক কাৰায়ত্ব কৰি বটদ্ৰৱা আৰক্ষীক খবৰ দিয়ে ৷ 

আৰক্ষীয়ে অপৰাধীক কৰায়ত্ব কৰি চিকিৎসাৰ বাবে নগাঁও ভোগেশ্বৰী ফুকননী অসামৰিক চিকিৎসালয়ত ভৰ্ত্তি কৰে ৷ ইপিনে, অকলশৰীয়া মহিলাগৰাকীৰ এই সাহসিকতাৰ বাতৰি লাহে লাহে বিয়পি পৰাৰ লগে লগে সকলোৱে একেমুখে প্ৰশংসা কৰিছে তেওঁৰ সাহসী পদক্ষেপক ৷ আনকি আৰক্ষী-প্ৰশাসনেও এনেধৰণৰ সমাজবিৰোধী কাৰ্যকলাপত জড়িত লোকৰ বিৰুদ্ধে নিৰ্যাতিতা মহিলাসকলে ঠাইতে এনেধৰণৰ সাহসী পদক্ষেপ গ্ৰহণ কৰিলে নিশ্চিতভাৱে এনে কু-কৰ্ম কৰিবলৈ নীচ মানসিকতাৰ লোকে বহুবাৰ চিন্তা কৰিব বুলিও মত ব্যক্ত কৰিছে ৷ 

আনহাতে ধুনীয়াভেটীৰ দৰে ভিতৰুৱা গ্ৰামাঞ্চলৰ এগৰাকী অকলশৰীয়া মহিলাই নিৰ্যাতনৰ সময়ত উপস্থিত বুদ্ধিৰে দেখুওৱা সাহসিকতাই বৰ্তমান ছচি'য়েল নেটৱৰ্কিং চাইটত বিশেষ প্ৰশংসা লাভ কৰা পৰিলক্ষিত হৈছে ৷ বহু নামী দামী মহিলা-যুৱতীৰ পৰা সৰ্বসাধাৰণ লোকে চৌৰাপাৰাৰ মহিলাগৰাকীৰ সাহসী পদক্ষেপক দৃষ্টান্ত হিচাপে লৈ অনাগত সময়ত সকলো নিৰ্যাতিতাক এনে ধৰ্ষণকাৰীৰ বিৰুদ্ধে এনে পদক্ষেপ গ্ৰহণ কৰিবলৈ মুকলি আহ্বান জনোৱা দেখা গৈছে ৷