শিৱসাগৰঃ শিৱসাগৰত চোৰাং তেলৰ ৰমৰমীয়া বেহা যে অব্যাহত আছে সেয়া পুনৰ স্পষ্ট হৈ পৰিছে। বিশেষকৈ আৰক্ষী প্ৰশাসনৰ দুৰ্বল ভূমিকাৰ সুযোগ গ্ৰহণ কৰি এটা চক্ৰই পেট্ৰ’ল-ডিজেলৰ চোৰাং বেহা চলাই জেপ গধূৰ কৰিবলৈ গৈ এই পৰ্যন্ত দুজনৰ প্ৰাণ হানি হৈছে। বিগত বৰ্ষত চোৰাং তেল সৰবৰাহ কৰা এখন ট্ৰেংকাৰত এজন জীৱন্তে অগ্নিদগ্ধ হৈ প্ৰাণহানি হোৱাৰ পিছত ৫ জানুৱাৰীৰ পুৱতি নিশা এজন যুৱকৰ মৃত্যু হয়। এই চাঞ্চল্যকৰ ঘটনা সংঘটিত হয় শিৱসাগৰ বেতবাৰী কাকতিগাঁৱত।
বেতবাৰী কাকতিগাঁৱৰ মনোজ দত্ত নামৰ ব্যক্তিজনৰ ঘৰৰ চৌহদত অবৈধভাৱে মজুত কৰি ৰখা ডিজেল ভৰ্তি এটা চিনটেক্সৰ টেংকৰ ভিতৰত উদ্ধাৰ হয় ক্ষণিক বৰুৱা (১৯) নামৰ এজন যুৱকৰ মৃতদেহ। আৰক্ষীয়ে এহেজাৰ লিটাৰৰ এটা চিনটেক্স কাটি উদ্ধাৰ কৰে চোৰাং তেলৰ বেহাৰ সৈতে জড়িত ক্ষণিক বৰুৱাৰ নিথৰ দেহ। প্ৰাপ্ত তথ্য অনুসৰি পুৱতি নিশা এখন বিলাসী বাহনত ক্ষণিক বৰুৱা গৈছিল মনোজ দত্তৰ ঘৰৰ চৌহদলৈ।