ডিজিটেল ডেস্কঃ বিশ্বৰ ভিতৰত ষষ্ঠ সংখ্যক ধনী দেশৰ স্থান লাভ কৰি কেন্দ্ৰীয় চৰকাৰে সমাদৰ লাভ কৰিলেও প্ৰকৃত ছবিখন ওলোটাহে৷ দেশৰ সম্পদ এতিয়া একাংশ পুঁজিপতিৰ হাতত থকা বুলি অভিযোগ উত্থাপন হৈ আহিছে৷
দেশৰ বেছিসংখ্যক লোকেই মধ্যবিত্ত আৰু দৰিদ্ৰ সীমা ৰেখাৰ তলৰ৷ যি সকল লোকে এসাজ খাই আন এসাঁজৰ বাবে হাহাকাৰ কৰিব লগা হয়৷ দিনৰ দিনটো শ্ৰম কৰি পৰিয়াল পোহপাল দিব লগা হয়৷
তাৰ মাজতে দৰিদ্ৰ সীমা ৰেখাৰ তলৰ ভূমিহীন, গৃহহীন পুৰুষ-মহিলাই পদপথত, গছৰ তলত, ৰেল ষ্টেচনত, আশ্ৰমত, বৃদ্ধাশ্ৰমত আশ্ৰয় ল’ব লগা হোৱাৰ লগতে ভিক্ষা বৃত্তিত জড়িত হ’ব লগা হয়৷ আমাৰ দেশৰ আঙুলিৰ মূৰত গণিব পৰা কেইগৰাকীমান লোকৰ হাতত দেশৰ সমষ্ট ধন-সম্পদ মজুত থকাৰ বিপৰীতে দেশৰ বেছিসংখ্যক লোকেই ধন-সম্পত্তিবিহীন৷
কেন্দ্ৰীয় চৰকাৰে শেহতীয়াকৈ প্ৰকাশ কৰা তথ্য মতে বিশ্বৰ চুপাৰ পাৱাৰ হ’বলৈ ওলোৱা ভাৰতত দিনক দিনেই ভিক্ষাৰীৰ সংখ্যা বৃদ্ধি পায় আহিছে৷ সামাজিক ন্যায় মন্ত্ৰী থাৱৰ চন্দ্ৰ গহলোটে লোকসভাত দাখিল কৰা লিখিত হিচাপ অনুসৰি দেশত ভিক্ষাৰীৰ সংখ্যা ৪ লাখতকৈ অধিক বুলি জানিব পৰা গৈছে৷
গহলোটে ২০১১ চনৰ লোকপিয়লৰ ভিত্তিত দাখিল কৰা তথ্য অনুসৰি দেশৰ সৰ্বমুঠ ভিক্ষাৰীৰ সংখ্যা হ’ল ৪ লাখ ১৩ হাজাৰ ৬৭০ জন৷ ইয়াৰে ২ লাখ ২১ হাজাৰ ৬৭৩ গৰাকী পুৰুষ আৰু ১ লাখ ৯১ হাজাৰ ৯৯৭ গৰাকী মহিলা ভিক্ষাৰী৷
দেশৰ ভিতৰতে সৰ্বাধিক ভিক্ষাৰী থকা ৰাজ্যখন হ’ল পশ্চিম বংগ৷ য’ত ৮১ হাজাৰ ২২৪ গৰাকী আছে৷ আনহাতে দ্বিতীয় স্থানত আছে উত্তৰ প্ৰদেশ ৬৫ হাজাৰ ৮৩৫ গৰাকী আৰু ২৯ হাজাৰ ৭২৩ গৰাকী ভিক্ষাৰীৰ সৈতে তৃতীয় স্থানত আছে বিহাৰ৷ ভিক্ষাৰী থকা ৰাজ্যৰ ভিতৰত মধ্য প্ৰদেশৰ স্থান হ’ল চতুৰ্থ৷ য’ত ২৮ হাজাৰ ৬৯৫ গৰাকীয়ে বাস কৰি আছে৷
উত্তৰ-পূবৰ ৰাজ্যসমূহৰ ভিতৰত অসম শীৰ্ষত থকাৰ লগতে আটাইতকৈ কম ভিক্ষাৰী থকা ৰাজ্য হ’ল মিজোৰাম৷ দক্ষিণৰ ৰাজ্যসমূহৰ ভিতৰত কেৰেলাই হৈছে কম ভিক্ষাৰী থকা ৰাজ্য আৰু সকলোতকৈ অধিক ভিক্ষাৰী বাস কৰা ৰাজ্য হ’ল অন্ধ্ৰপ্ৰদেশ৷ এই হিচাপৰ ভিত্তিত সৰ্বাধিক পুৰুষতকৈ মহিলা ভিক্ষাৰী থকা ৰাজ্য হ’ল পশ্চিম বংগ, মণিপুৰ আৰু অসম৷ ইয়াৰোপৰি কেন্দ্ৰীয় শাসিত ৰাজ্যৰ ভিতৰত দেশৰ ৰাজধানী দিল্লীতেই অধিক ভিক্ষাৰী আছে৷ দিল্লীৰ ভিক্ষাৰীৰ সংখ্যা হ’ল ২১৮৭ ৷ আনহাতে চণ্ডীগঢ়ত মাত্ৰ ১২১ জন আছে৷