আগৰতলাঃ ত্ৰিপুৰা বিধানসভাৰ নিৰ্বাচনৰ গৰম বতাহ এতিয়া মিডিয়াত বলিব ধৰিছে৷ বিজেপিয়ে অনুমান কৰা মতেই ফলাফল লাভ কৰাৰ পিছতেই এতিয়া নানা তৰহৰ চৰ্চা আৰম্ভ হৈছে৷ কোন মুখ্যমন্ত্ৰী হ’ব৷ কাৰ বাবে বিজেপিয়ে এই ফলাফল আজুৰি আনিলে তাক লৈ ব্যাপক চৰ্চা আৰম্ভ হৈছে৷ ৰাজ্যখনত ২৫ বছৰ শাসনকাৰী দল চিপিএমৰ তচনচ কৰি বিজয়ধ্বজা উৰুৱাইছে কেন্দ্ৰৰ শাসনকাৰী দল বিজেপিয়ে৷ চাৰিবাৰকৈ মুখ্যমন্ত্ৰী পদত অধিষ্ঠিত হৈ থকা মাণিক সৰকাৰক আকৌ দেখিবলৈ পোৱা নাযাব ত্ৰিপুৰাৰ মুখ্যমন্ত্ৰী ৰূপে৷
আকৌ দেশৰ দুখীয়া মুখ্যমন্ত্ৰীৰ তালিকাত নাম দেখিবলৈ পোৱা নাযাব মাণিক সৰকাৰৰ৷ গেৰুৱা দল বিজেপিয়ে বাওঁপন্থী দলক শোচনীয়ভাৱে গাদীচ্যুত কৰি উত্তৰ-পূবৰ ৰাজ্যত লাহে লাহে একাধিপত্য বিস্তাৰ কৰিবলৈ সক্ষম হৈছে৷ পূৰ্বৰ মুখ্যমন্ত্ৰী মাণিক সৰকাৰক ক্ষমতাৰ পৰা আঁতৰাই পেলোৱাৰ পাছত তেওঁৰ ৰাজনৈতিক জীৱনৰ ভৱিষ্যত কি হ’ব সেয়াহে লক্ষণীয় হৈ পৰিছে৷ মাণিক সৰকাৰ কোন? এই প্ৰশ্নটোৰ সহজ উত্তৰ লাভ কৰিছিল সমগ্ৰ দেশৰ প্ৰজাই বিধান সভাৰ নিৰ্বাচনৰ পূৰ্বেই৷ যিটো প্ৰশ্নৰ উত্তৰটোৱেই দিছিল মাণিক সৰকাৰৰ পৰিচয়৷
