নগাঁওঃ নগাঁও জিলাৰ অন্তৰ্গত বটদ্ৰৱা আৰক্ষী নিৱেশৰ অন্তৰ্গত বটদ্ৰৱা সৰুহিছা গাঁওবাসীৰ লগতে নগাঁও আৰক্ষীক আতংকিত কৰি আজি দিন দুপৰতে এক ডকাইতিৰ ঘটনা সংঘটিত হোৱা কাৰ্যই তীব্ৰ চাঞ্চল্যৰ সৃষ্টি কৰিছে ৷ প্ৰাপ্ত খবৰ মতে, বটদ্ৰৱাৰ সৰুহিছা গাঁৱৰ নিবাসী উপেন কাকতি আৰু তেওঁৰ পত্নী সুমিত্ৰা খাটনিয়াৰ ঘৰত দুপৰীয়া কোনো নথকাৰ সুযোগ লৈ ঘৰৰ ছিলিঙৰ এচি বৰ্ডৰ ওপৰৰ চাং ভাঙি কোনো দুৰ্বৃত্তই ঘৰত প্ৰৱেশ কৰি লুট পাত কৰি নিয়ে ৷
বিদ্যালয়ত চাকৰি কৰা সুমিত্ৰা খাটনিয়াৰ বিয়লি ঘৰলৈ ওভতি আহি ভিতৰৰ কোঠাৰ এচি বৰ্ড ভাঙি থকাৰ লগতে ভিতৰৰ কোঠা আৰু পিছফালৰ দুৱাৰ খুলি থকাৰ ওপৰিও সামগ্ৰীবোৰ চেদেলি-ভেদেলি হৈ থকা দেখি হুলস্থুল কৰাত প্ৰতিবেশী লোক গোট খোৱাত দিন-দুপৰতে চুৰি কাৰ্য সংঘটিত হোৱাৰ বিষয়টো পোহৰলৈ আহে ৷
পিছত ঘটনাস্থলীত বটদ্ৰৱা আৰক্ষী উপস্থিত হৈ গতানুগতিকতাৰে তদন্ত আৰম্ভ কৰে ৷
