ৰাজপথত হেংদাং লৈ প্ৰতিবাদ

নগাঁওঃ নাগৰিকত্ব সংশোধনী বিধেয়ক-২০১৬ৰ বিৰুদ্ধে ৰাজ্যজুৰি তীব্ৰ প্ৰতিবাদ অব্যাহত থকাৰ মাজতে আজি নগাঁও জিলা সাংবাদিক সমাজৰ উদ্যোগত উলিওৱা এক বিশাল প্ৰতিবাদী সমদলে নগাঁও চহৰৰ ৰাজপথ কঁপাই তোলে। একাংশ প্ৰতিবাদকাৰীয়ে হাতত হেংদাং লৈ জাতিদ্ৰোহীক সাৱধান কৰি দিয়ে৷

পুৱা প্ৰায় ১১.৩০ বজাত চহৰৰ শ্বহীদ ভৱনৰপৰা উলিওৱা এই প্ৰতিবাদী সমদলটি আনুষ্ঠানিকভাৱে মুকলি কৰে বিশিষ্ট শিক্ষাবিদ, গৱেষক তথা সাহিত্যিক ড° নৰেন কলিতাই। তেওঁ সমদল মুকলি কৰি দিয়া ভাষণত বি জে পি নেতৃত্বাধীন কেন্দ্ৰীয় আৰু ৰাজ্য চৰকাৰক কঠোৰ সমালোচনা কৰি কয় যে জাতীয় জীৱনৰ জটিল সন্ধিক্ষণত জাতিটোক ৰক্ষা কৰিবলৈ সকলো আগবাঢ়ি আহিব লাগে।