ডিফুঃ আসন্ন লোকসভা নিৰ্বাচনৰ প্ৰতি লক্ষ্য ৰাখি কংগ্ৰেছৰ ৰাষ্ট্ৰীয় সভাপতি ৰাহুল গান্ধীয়ে ঘোষণা কৰা দেশৰ দৰিদ্ৰ সকলৰ বাবে পৃথিৱীৰ ভিতৰত বৃহৎ আঁচনি “ন্যুনতম আয় যোঁজনা”ক লৈ সাংসদ তথা ডিফু (জনজাতি) লোক সভা সমষ্টিৰ প্ৰাৰ্থী বীৰেণছিং ইংতিয়ে জিলা কংগ্ৰেছৰ মুখ্য কাৰ্যালয়ত বৃহস্পতিবাৰে বিয়লি এক সংবাদ মেলৰ আয়োজন কৰে৷
সাংসদ বীৰেণ চিং ইংতিয়ে “ন্যুনতম আয় যোজনা”ৰ উদৃতি দি কয় যে ২০ শতাংশ দৰিদ্ৰ পৰিয়ালক বছৰি ৭২ হাজাৰ টকা প্ৰদান কৰাৰ সম্পূৰ্ণ গেৰাণ্টি, উক্ত ৭২ হাজাৰ টকা মহিলাৰ একাউণ্টত প্ৰত্যক্ষভাৱে সোমোৱাই দিয়া হ’ব৷ উক্ত ঐতিহাসিক পদক্ষেপৰ জৰিয়তে ৫ কোটি জনতা উপকৃত হ’ব৷ জনকল্যাণমূলক কোনো আঁচনি কৰ্তন কৰা নহ’ব, ছাবছিডি সমুহ অক্ষত থাকিব৷ কংগ্ৰেছ-ইউপিএই মহাত্মা গান্ধী এনৰেগা আঁচনিৰ ৰূপায়ণৰ জৰিয়তে ১৪ কোটি লোকক উপকৃত কৰাৰ লগতে ‘ন্যুনতম আয় যোজনা’ৰ জৰিয়তে ২৫ কোটি লোকৰ সহায় হ’ব৷