কাজিৰঙাঃ সমগ্ৰ বিশ্বতে কৰ’নাতংকই মানৱ জাতিৰ প্ৰতি ভাবুকি সৃষ্টি কৰাৰ লগতে বিশ্ব অৰ্থনীতিলৈকো কঢ়িয়াই আনিছে মন্দাৱস্থা৷ কৰ’না ভাইৰাছ সংক্ৰমণ প্ৰতিৰোধৰ বাবে জাৰি কৰা লকডাউনৰ ফলত দৰিদ্ৰ সীমাৰেখাৰ তলৰ লোকসকলৰ আয়ৰ পথসমূহ সম্পূৰ্ণৰূপে বন্ধ হৈ পৰিছে৷ ইয়াৰ লগে লগে দৈনিক উপাৰ্জনৰে জীৱন নিৰ্বাহ কৰা লোকসকলৰ মাজত সম্প্ৰতি হাহাকাৰ অৱস্থাৰ সৃষ্টি হৈছে৷ এনে সংকটৰ সময়ত সেই দৰিদ্ৰ লোকসকলক যৎপৰোনাস্তি সকাহ দিয়াৰ উদ্দেশ্যে আগবাঢ়ি আহিছে কাজিৰঙাৰ দল-সংগঠন তথা কেইবাজনো ব্যক্তি৷
অসম জাতীয়তাবাদী যুৱ-ছাত্ৰ পৰিষদৰ বোকাখাত জিলা সমিতিৰ উদ্যোগত কাজিৰঙা আঞ্চলিক সমিতিৰ সহযোগত কাজিৰঙাৰ বিভিন্ন প্ৰান্তৰৰ দৰিদ্ৰ সীমাৰেখা তলৰ ২৫ টা পৰিয়ালক খাদ্য সামগ্ৰী চাউল, দাইল, আলু, মিঠাতেলৰ উপৰিও চাবোন আদি বিতৰণ কৰা হয়। সংগঠনটোৰ জিলা সমিতিৰ সভাপতি নীলোৎপল খাউণ্ড, সাধাৰণ সম্পাদক অনন্ত গগৈ, কেন্দ্ৰীয় সমিতিৰ যুটীয়া সম্পাদক বিপুল বৰাৰ নেতৃত্বত যোৱা এটা দলে উক্ত কাৰ্যসূচী ৰূপায়ণ কৰে৷