……সাত বছৰে সম্পূৰ্ণ নহ’ল বৰছলা আদৰ্শ চিকিৎসালয়ৰ গৃহ নিৰ্মাণ……গড়কাপ্তানি পথৰ শোচনীয় অৱস্থা…… বিভাগৰ নিৰ্বিকাৰ ভূমিকা….. ৰাইজৰ সমালোচনা
ঢেকীয়াজুলি পৰা নাৰায়ণ ফয়েল:
বিগত বিধান সভা নিৰ্বাচনত উন্নয়ন আৰু পৰিৱৰ্তনৰ প্ৰতিশ্ৰুতি দিয়া বিজেপি মিত্ৰজোঁটে চৰকাৰ গঠন কৰাৰ পিছতেই উন্নয়নৰ প্ৰতিশ্ৰুতি পাহৰিলে ৷ এই চৰকাৰৰ দিনত গ্ৰাম্যাঞ্চলৰ বাট-পথৰ উন্ উন্নয়নৰ নামত একো পৰিৱৰ্তনৰ নামত কথা চৰকাৰৰ আমোলত ৰাজ্যৰ গ্ৰাম্যঞ্চলৰ বাট-পথ সমূহৰ উন্নয়ন হোৱা নাই ৷ প্ৰতিটো অঞ্চলৰ সমউন্নয়নৰ শ্লোগান দিয়া বিজেপি মিত্ৰজোঁটৰ চৰকাৰখনে এইক্ষেত্ৰত ব্যৰ্থতা প্ৰদৰ্শন কৰিছে ৷ গ্ৰাম্যঞ্চলৰ বাট-পথ নিৰ্মাণৰ ক্ষেত্ৰত বিজেপি মিত্ৰজোঁটৰ চৰকাৰৰ অমনোযোগিতা আৰু গড়কাপ্তানি বিভাগৰ নিৰ্বিকাৰ ভূমিকাক লৈ ৰাইজৰ মাজত তীব্ৰ প্ৰতিক্ৰিয়াৰ সৃষ্টি হৈছে ৷ শোণিতপুৰ জিলাৰ বৰছলা সমষ্টিৰ ভিতৰুৱা অঞ্চলৰ বাট-পথ সমূহৰ উন্নয়ন হোৱা নাই ৷ সমষ্টিটোৰ গ্ৰাম্যাঞ্চলৰ একাধিক পথ দীৰ্ঘদিন ধৰি শোচনীয় অৱস্থাত আছে ৷ সমষ্টিবাসী ৰাইজে শোচনীয় বাট-পথেৰে যাতায়াত কৰিব লগীয়া হৈছে ৷ বৰছলা সমষ্টিৰ নতুন চিৰাজুলি-বালিজান সংযোগী পথটি দীৰ্ঘদিন ধৰি শোচনীয় অৱস্থাত থকাৰ পিছতো পথটিৰ উন্নয়নৰ বাবে গড়কাপ্তানি বিভাগে কোনো আচঁনি গ্ৰহণ কৰা নাই ৷ বৃহত্তৰ শিঙৰী অঞ্চলৰ নতুন শিঙৰী, নতুন চিৰাজুলি, সোলালভেটি , বালিজান, বালিজান কচাৰী আদি গাওঁৰ বৃহৎ সংখ্যক লোকে যাতায়ত কৰা এই পথটি দীৰ্ঘদিন ধৰি বিধস্ত অৱস্থাত আছে। বিশেষকৈ বালিজান অঞ্চলৰ ৰাইজে এই পথেৰে ঢেকীয়াজুলিলৈ অহা-যোৱা কৰে ৷ মাত্ৰ পাচঁ কিলোমিটাৰ দৈৰ্ঘ্যৰ গ্ৰাম্য পথটি যোৱা বিশ বছৰেও উন্নয়ন হোৱা নাই ৷ বিগত কংগ্ৰেছ চৰকাৰৰ পোন্ধৰবছৰীয়া শাসনত পথটিৰ উন্নয়ন হোৱা নাই ৷ বৰ্তমানৰ পৰিৱৰ্তনকামী চৰকাৰ তথা জনপ্ৰতিনিধি সকলে এইক্ষেত্ৰত মৌন ভূমিকা পালন কৰাত ৰাইজে অসন্তুষ্টি প্ৰকাশ কৰিছে ৷ পথটিৰ উন্নয়নৰ বাবে আচঁনি গ্ৰহণ কৰিবলৈ স্থানীয় ৰাইজে জনপ্ৰতিনিধি সকলৰ ওচৰত দাবী জনাই আহিছে যদিও স্থানীয় বিধায়ক-সাংসদ আৰু পঞ্চায়ত প্ৰতিনিধি সকলে মৌন ভূমিকা পালন কৰিছে বুলি স্থানীয় ৰাইজে অভিযোগ কৰে ৷ স্থানীয় বিধায়ক গণেশ কুমাৰ লিম্বু আৰু সাংসদ পল্লৱলোচন দাসক ৰাইজে তীব্ৰ সমালোচনা কৰে ৷ বিধায়ক আৰু সাংসদ গৰাকীয়ে এইক্ষেত্ৰত মৌন ভূমিকা পালন কৰাত স্থানীয় ৰাইজ বাৰুকৈ ক্ষুব্ধ হৈ পৰিছে ৷ ক্ষুব্ধ ৰাইজে গড়কাপ্তানী বিভাগৰ বিষয়া-অভিযন্তা সকলকো সমালোচনা কৰে আৰু বিভাগটোক অকৰ্মণ্য আখ্যা দিয়ে ৷ এই পথটি অতি শীঘ্ৰে নিৰ্মাণৰ ব্যৱস্থা গ্ৰহণ কৰিবলৈ ৰাইজে দাবী জনাইছে ৷